Energetıka mınıstrligi Teńiz termınalyndaǵy úshinshi aılaq tolyq jumys isteı bastaǵanyn rastady

ASTANA. KAZINFORM – Kaspıı qubyr konsortsıýmynyń Teńiz termınalynda jóndeý jumystary tolyq aıaqtalyp, úshinshi aılaq qurylǵysy ónerkásiptik paıdalanýǵa engizildi.

Bul týraly KAZINFORM tilshisine, Energetıka mınıstriniń keńisshisi, mınıstrliktiń resmı ókili Ásel Serikpaeva málim etti.

– Jóndeý aıasynda qalpyna keltirý jáne tehnıkalyq jumystar tolyq oryndalyp, qurylǵynyń qaýipsiz jumysqa daıyn ekendigin rastaý úshin qajetti synaqtar júrgizildi. Úshinshi aılaqtyń iske qosylýy munaıdy eki aılaq qurylǵysy arqyly bir mezgilde jóneltýge múmkindik beredi, - dedi mınıstrliktiń resmı ókili.

Aıtýynsha, bul Teńiz termınalynyń jumys senimdiligin arttyryp, josparlaý múmkindikterin keńeıtedi ári Qazaqstannyń munaı eksporty jónindegi mindettemelerin kestege saı oryndaýǵa múmkindik beredi. 

– Nysandardy paıdalaný ónerkásip jáne ekologııalyq qaýipsizdik talaptaryna qatań sáıkestikpen júzege asyrylyp jatyr dedi Ásel Serikpaeva.

Eske salsaq, 2025 jyldyń aıaǵynda Kaspıı qubyr konsortsıýmy Teńiz termınaly aýmaǵyndaǵy meteorologııalyq jaǵdaıǵa baılanysty munaıdy tıeý ýaqytsha toqtatylǵan bolatyn.