Energetıka mınıstrligi tarıfterdi basqarý boıynsha tsıfrlyq servısti iske qosty
ASTANA. KAZINFORM – Qazaqstan Respýblıkasy Energetıka mınıstrligi energııa óndirýshi uıymdardyń tarıftik ótinimderin qaraý úderisine arnalǵan tarıfterdi basqarý boıynsha jańa tsıfrlyq servısti pılottyq rejımde iske qosty. Atalǵan servıs elektr energııasyna shekti tarıfti bekitý úderisin tsıfrlandyrýǵa baǵyttalǵan.
Jańa júıe energııa óndirýshi uıymdarǵa ótinimderdi qaǵazsyz, elektrondyq formatta usynýǵa múmkindik beredi. Bul qaǵaz qujat aınalymyn joıyp, ótinimderdi qaraý, bekitý protsessin jeńildetip, jedeldetedi. Tsıfrlyq servıs ótinim berýden bastap, sońǵy sheshim qabyldaýǵa deıingi tolyq tsıkldi qamtıdy. Qujattarǵa elektrondyq tsıfrlyq qoltańba (ETsQ) arqyly qol qoıý múmkindigi qarastyrylǵan. Elektr energııasyna shekti tarıf 7 jyl merzimge bekitiledi.
Jańa júıeniń engizilýi – Energetıka mınıstrliginiń memlekettik qyzmetterdi tsıfrlandyrý jáne bıýrokratııany azaıtý baǵytyndaǵy mańyzdy qadamdarynyń biri. Servıs qujat aınalymynyń zańdy kúshin saqtaı otyryp, saladaǵy protsesterdiń ashyqtyǵy men tıimdiligin arttyrady. Mınıstrlik atalǵan servısti aldaǵy ýaqytta paıdalanýshylardyń usynys-tilekteri men jasandy ıntellekt elementterin eskere otyryp jetildirýdi josparlap otyr.
Aıta keteıik, atalmysh joba Otyn-enernetıka kesheniniń tsıfrlyq transformatsııasy kartasy aıasynda ázirlenip, Energetıka mınıstrligi júzege asyryp jatqan EnergyTech platformasyna kiriktirilgen.
Eske sala keteıik, buǵan deıin Qytaı energetıka salasyna JI engizýdi kózdep otyrǵanyn jazǵan edik.