Energetıka mınıstrligi suıytylǵan gaz baǵasyn 1 tamyzdan bastap ózgertýdi usyndy
ASTANA. KAZINFORM - QR Energetıka mınıstrligi «Ashyq NQA» portalynda Energetıka mınıstriniń buıryǵy jobasynyń jarııalanǵany týraly habarlady.

Oǵan sáıkes osy jyldyń 1 tamyzynan bastap Qazaqstanda suıytylǵan munaı gazynyń baǵasyna túzetý engizý júzege asyrylyp jatyr. Buıryq jobasynda avtogaz quıý stantsııalary úshin suıytylǵan munaı gazynyń shekti bólshek saýda baǵasyn túzetý engizý kózdelgen.
Suıytylǵan gaz óndirisiniń qazirgi quny tonnasyna 70-ten 80 myń teńgege deıin, al óndirýshi zaýyttar úshin shekti kóterme baǵa tonnasyna 51 932 teńge deńgeıinde belgilengen.
Osyǵan baılanysty, óndirýshi zaýyttarda jyl saıynǵy josparly jóndeýdi jańǵyrtý jáne júrgizý úshin qarajat tapshylyǵy baıqalǵan. Rentabeldilik jaǵdaıynda suıytylǵan gaz óndirisine degen qyzyǵýshylyq azaıady, zaýyttar neǵurlym únemdi ónim shyǵarýǵa aýysýdy jón kóredi.
Aıta ketý kerek, suıytylǵan munaı gazyn tutyný kórsetkishi artyp keledi: 2022 jyly 1,8 mln tonna, 2024 jyly 2,4 mln tonna.
Sarapshylardyń boljamy boıynsha, 2025 jyly ishki naryqta tutyný kólemi taǵy 200 myń tonnaǵa artyp, 2,6 mln tonna boldy. Bul jaǵdaıda gaz tapshylyǵy 30-40% bolýy múmkin.
Bul rette Qazaqstandaǵy suıytylǵan munaı gazynyń baǵasy TMD elderi arasynda eń tómen baǵalardyń biri bolyp qala beredi.
Buıryq jobasyna sáıkes suıytylǵan gazdyń shekti kóterme baǵasy tonnasyna 51 932 teńgeden 59 722 teńgege deıin kóteriledi.
Shekti bólshek saýda baǵasy 7-den 10 teńgege deıin ulǵaıady.
Bul shara ishki naryqty tolyqqandy qamtamasyz etýge, sondaı-aq gaz óńdeýge ınvestıtsııa tartý úshin jaǵdaı jasaýǵa baǵyttalǵan.
Aıta keteıik, Oralda júrgizýshiler suıytylǵan gaz tapshylyǵyna tap boldy.
Óńirlerge suıytylǵan gaz bólý protsesi avtomattandyrylady.
Suıytylǵan gazdy Qazaqstan aýmaǵynan áketýge tyıym salý uzartyldy.