Energetıka mınıstrligi suranysqa ıe mamandyqtarǵa 1500 grant bóldi
ASTANA. KAZINFORM — Energetıka salasy boıynsha mamandardy daıarlaýǵa arnalǵan bilim berý granttary konkýrsyna ótinish qabyldaý bastaldy.
2025 jylǵy 13 shildeden bastap Qazaqstan Respýblıkasynda joǵary jáne joǵary oqý ornynan keıingi bilim alýǵa arnalǵan bilim berý granttary konkýrsyna ótinishter qabyldaý bastaldy.
— Elimizdiń energetıka salasynyń belsendi damýyna jáne zamanaýı tehnologııalardy qoldanatyn jańa energııa óndirýshi nysandardyń paıda bolýyna baılanysty jańa býynnyń bilikti mamandaryna suranys artýda. Ásirese elektr jelilerin, gaz týrbınalaryn, bý-gaz qondyrǵylaryn jáne atom elektr stantsııalaryn jobalaý, qurastyrý jáne paıdalanýǵa berý salalarynda mamandar qajet, — delingen Energetıka mınıstrligi taratqan habarlamada.
2025/2026 oqý jylyna arnalǵan memlekettik bilim berý baǵdarlamasy aıasynda energetıka salasynda suranysqa ıe tehnıkalyq baǵyttar boıynsha kelesi granttar bólindi:
«V062 — Elektrotehnıka jáne energetıka» baǵyty boıynsha — 1000 grant,
«V162 — Jylýenergetıka» baǵyty boıynsha — 500 grant (tolyq jáne qysqartylǵan oqý túrlerin qosa alǵanda).
Energetıka salasyn kadrlarmen qamtamasyz etý jetekshi salalyq joǵary oqý oryndary jáne óndiristik kompanııalarmen tyǵyz yntymaqtastyqta júzege asyrylady. Mundaı model túlekterdiń eńbek naryǵy talaptaryna tez beıimdelýine jáne naqty energetıka nysandaryna jumysqa ornalasýyna múmkindik beredi.
Energetık mamandyǵyn nasıhattaý jáne onyń tartymdylyǵyn arttyrý maqsatynda «Almatınskıe elektrıcheskıe stantsıı» AQ jyl saıyn bolashaq mamandarǵa qoldaý kórsetedi. Bıyl kompanııa Ǵumarbek Dáýkeev atyndaǵy Almaty energetıka jáne baılanys ýnıversıtetinde oqýǵa qosymsha 10 bilim berý grantyn usynady.
Aıta ketelik sý salasy mamandyqtaryna túsetin stýdentter úshin grant sany 70%-ǵa artqan edi.