Energetıka mınıstrligi satyp alý erejelerin qatańdatty: endi 80% qazaqstandyq úles talap etiledi
ASTANA. KAZINFORM – Energetıka mınıstrligi «Jer qoınaýyn paıdalanýshylardyń jáne olardyń merdigerleriniń kómirsýtekterdi barlaý nemese óndirý jónindegi operatsııalardy júrgizý kezinde paıdalanylatyn taýarlardy, jumystardy jáne kórsetiletin qyzmetterdi satyp alý qaǵıdalaryna» ózgerister engizdi.
Mınıstrlik taratqan aqparatqa sáıkes, jańa túzetýler mynalardy qamtıdy:
Otandyq naryqty qoldaý: jobalyq jumystardy oryndaý kezinde elishilik qundylyqtyń eń tómen kórsetkishi 80% deńgeıinde belgilendi.
Beırezıdent merdigerlerdiń mindettemeleri: Qazaqstan aýmaǵynan tys jobalarǵa jumystardy oryndaý jáne qyzmetterdi kórsetý úshin mindetti túrde qazaqstandyq rezıdentterdi tartý kózdeldi.
Ýran óndirýge qatysty ózgeris: ýran óndirisine qatysty erejeler Qaǵıdalardan alynyp tastaldy. Bul saladaǵy talaptar men baqylaýdy Atom energııasy jónindegi agenttik júzege asyrady.
Salyq kodeksine sáıkestik: 2026 jylǵy 1 qańtardan bastap kúshine enetin jańa Salyq kodeksine oraı, rentabeldigi tómen ken oryndary boıynsha bir kelisimshart aıasynda jumystar men qyzmetterdi bir lotpen satyp alý múmkindigi qarastyryldy.
Qazaqstandyq taýar óndirýshilerdi qoldaý: 2025 jylǵy 19 mamyrda qabyldanǵan zańǵa sáıkes, qazaqstandyq taýar óndirýshilerden satyp alýdy jáne konkýrs ótkizý kezinde tek otandyq óndirýshilerdiń qatysýyn qamtamasyz etýge baǵyttalǵan ózgerister engizildi.
Energetıka mınıstrligi bul túzetýlerdiń basty maqsaty – otandyq óndiristi qoldaý, jergilikti kadrlar men kásiporyndardy tartý, sondaı-aq halyqaralyq tájirıbege sáıkes satyp alý rásimderin jetildirý ekenin atap ótti.
Aıta keteıik, memlekettik satyp alý týraly birqatar buıryqqa ózgeris engizildi.