Energetıka mınıstrligi: Orynbor zaýytyndaǵy apatqa baılanysty Qazaqstan gazsyz qalmaıdy
ASTANA. KAZINFORM – Energetıka mınıstrligi Orynbor gaz óńdeý zaýytynda bolǵan tótenshe jaǵdaıǵa qatysty resmı túsinikteme berdi.
«Gazpromnyń» málimetinshe, 2025 jylǵy 19 qazanda Orynbor gaz óńdeý zaýytyna ushqyshsyz áýe apparatynyń shabýyly saldarynan apatty jaǵdaı tirkelgen. Sonyń nátıjesinde zaýyt Qarashyǵanaq ken ornynan shıkizat gaz qabyldaýdy ýaqytsha toqtatqan.
- Qazirgi ýaqytta zaýyttyń zaqymdaný dárejesi men jumysty qalpyna keltirý merzimi jóninde reseılik taraptan aqparat túsken joq, - dep málimdedi QR Energetıka mınıstrliginen.
Vedomstvonyń habarlaýynsha, Qazaqstan óz aýmaǵyn gazben qamtamasyz etýde eshqandaı zardap shekken joq, gaz ishki tutynýshylarǵa qalypty rejımde, eshqandaı shekteýsiz jetkizilýde.
- Qarashyǵanaq shıkizatyn óńdeý men munaı óndirýge yqtımal áser máselesi ken paıdalanýshylarymen birlesip qarastyrylyp jatyr. Shyǵyn kólemi men aldaǵy sharalar týraly qosymsha habarlanatyn bolady, - delingen aqparatta.
Energetıka mınıstrligi jaǵdaıdy baqylaýda ustap, reseılik tarap pen ken orny operatorlarymen turaqty baılanys ornatqan.
Aıta keteıik, Mańǵystaýda gazdy ózge óńirlerge satqan kásipkerler anyqtaldy.