Energetıka mınıstrligi munaı kelisimsharttaryn qaıta qarap, operatorlardy aýystyrýy múmkin

ASTANA. KAZINFORM – QR Energetıka mınıstrligi aldaǵy 2-3 jylda ónimdi bólý týraly kelisimderdi (ÓBK) uzartý boıynsha sheteldik ınvestorlarmen kelissózder júrgizbek. Bul týraly sala mınıstri Almasadam Sátqalıev Kazinform tilshisiniń suraǵyna jaýap berdi.

Mınıstrdiń aıtýynsha, Úkimet qoldanystaǵy ÓBK kelisimsharttaryn jáne olardy uzartý sharttaryn qarastyratyn arnaıy komıssııa qurǵan.

– Sonymen qatar, konsortsıým qatysýshylarynyń ózderi birneshe ret Úkimet tıisti kelisimderdi uzartýdy josparlap otyrǵan-otyrmaǵanyn anyqtaý qajettigin kótergen. Mundaǵy áńgime ınvestıtsııalar men bolashaq kapıtal salymdaryn josparlaýǵa qatysty. Biz obektilerdi barynsha tıimdi deńgeıde eksplýatatsııalaýdy mańyzdy dep sanaımyz. Degenmen, ÓBK sharttaryna sáıkes, bizde áli ýaqyt bar ekenin aıtý kerek. Bul kelissózderdi júrgizýge kem degende 2-3 jyldaı ýaqyt bar, - dedi Sátqalıev Úkimettegi brıfıngte.

Onyń aıtýynsha, ÓBK-ny uzartý sharttarynyń biri retinde kelisimshart talaptaryn jaqsartý, Qazaqstannyń úlesin arttyrý jáne keıbir operatorlardy aýystyrý máseleleri qarastyrylýy múmkin.

– Sońǵy sheshim ashyq, tikeleı, básekege qabiletti dıalog negizinde jáne halyqaralyq quqyqqa sáıkes qabyldanatyn bolady, - dep tolyqtyrdy mınıstr.

Búgin Prezıdent Úkimettiń keńeıtilgen otyrysynda jer qoınaýyn paıdalanýda reforma esh kedergige qaramastan jalǵasýy kerek ekenin aıtqan edi.