Munaı-gaz sektorynda qazaqstandyq qamtýdy damytý: mınıstrlik jańa tetikter engizbek

ASTANA. KAZINFORM — Elishilik qundylyqty damytý jáne otandyq taýar óndirýshilerdi qoldaý maqsatynda Energetıka mınıstrligi iri munaı-gaz jobalarynyń operatorlarymen birlesip retteletin satyp alýlarda jergilikti qamtý úlesin arttyrý baǵytynda júıeli jumys júrgizip jatyr. Bul týraly Energetıka mınıstrligi málim etti.

— Osy baǵyttaǵy mańyzdy bastamalardyń biri — Teńiz jobasy aıasynda bes jyl merzimge bekitilgen Qazaqstandyq qamtýdy damytý baǵdarlamasy. Baǵdarlamada taýarlar, jumystar men qyzmetterdegi jergilikti qamtý úlesin arttyrý boıynsha naqty maqsatty ındıkatorlar belgilengen, — delingen habarlamada.

Sondaı-aq, qujatta satyp alý úderisterin jetildirýge arnalǵan quraldar men tetikter, otandyq óndirýshilerdi qoldaý jáne yntalandyrý sharalary kórsetilgen. Atap aıtqanda, uzaq merzimdi kelisimsharttar men offteık-kelisimder jasaý, ınvestıtsııaǵa aıyrbastalatyn kelisimder engizý, sondaı-aq taýar óndirisin Qazaqstan aýmaǵynda lokalızatsııalaý boıynsha naqty sharalar qarastyrylǵan.

Aıta keteıik, buǵan deıin Qazaqstannan Ózbekstanǵa benzın eksporttalmaıtynyn jazǵan edik.