Energetıka mınıstrligi men «Shell Qazaqstan» geologııalyq barlaý júrgizý týraly kelisimshartqa qol qoıdy
ASTANA. KAZINFORM - QR Energetıka mınıstrligi men «Shell Qazaqstan» kompanııasy Aqtóbe oblysyndaǵy «Jańaturmys» ýchaskesinde geologııalyq barlaý jumystaryn júrgizý jónindegi kelisimshartqa qol qoıdy.
QR Energetıka mınıstrligi baspasóz qyzmetiniń habarlaýynsha, qujatqa QR Energetıka vıtse-mınıstri Erlan Aqbarov pen «Shell » kontserniniń Qazaqstandaǵy aǵa vıtse-prezıdenti ári tóraıymy Sıýzann Kýgan qol qoıdy.
Kelisimge saı kompanııa belgilengen aýmaqta seısmıkalyq barlaý jumystaryn júrgizip, geologııalyq derekterdi jınap, tehnıkalyq baǵalaý jasaıdy. Barlyq jumystar qoldanystaǵy zańnama talaptaryna sáıkes jáne tıisti ruqsattar alynǵannan keıin júzege asyrylady.
- Bul joba eldiń energetıkalyq qaýipsizdigin nyǵaıtýǵa jáne kómirsýtek qoryn uzaqmerzimge ulǵaıtýǵa baǵyttalǵan. Sondaı-aq bul bastama turaqty ekonomıkalyq ósimge de serpin beredi, - dedi QR Energetıka vıtse-mınıstri Erlan Aqbarov.
Al «Shell» kontserniniń Qazaqstandaǵy aǵa vıtse-prezıdenti ári tóraǵasy Sıýzann Kýgan:
- Bul qujat «Shell» kompanııasynyń Qazaqstanmen uzaqmerzimdi yntymaqtastyqty jalǵastyrýǵa daıyn ekenin kórsetedi. Biz tájirıbemiz ben ozyq tehnologııalarymyzǵa súıene otyryp, geologııalyq barlaý isine jáne eldiń resýrstyq bazasyn keńeıtýge úles qosamyz, – dedi.
Aýmaǵy 1 377 sharshy shaqyrymdy quraıtyn «Jańaturmys» ýchaskesi eldegi perspektıvaly munaı-gaz basseınderiniń birinde ornalasqan. Joba aıasynda 3D seısmıkalyq zertteýler júrgizilip, tereń barlaý uńǵymasyn burǵylaý múmkindigi qarastyrylǵan.
Jobanyń aýqymy men tehnıkalyq kúrdeliligin eskere otyryp, kelisimsharttyń merzimi 2032 jylǵa deıin belgilendi. Qujat jetildirilgen úlgilik kelisimshart talaptary negizinde iske asyrylady. Kelisim kezeńinde «Shell» kompanııasy ýchaske ornalasqan óńirdiń áleýmettik-ekonomıkalyq damýyna keminde 100 mln teńge bóledi.
Aıta keteıik, qazirgi ýaqytta elimizde jer qoınaýyn paıdalaný salasynda kómirsýtekterdi barlaý jáne óndirý boıynsha 321 kelisimshart qoldanysta.
Osyǵan deıin Astanada halyqaralyq geologııalyq forým ótetini týraly jazdyq.