Energetıka mınıstrligi kómir jetkizilimderin monıtorıngteýdiń biryńǵaı tsıfrlyq júıesin iske qosty
ASTANA. KAZINFORM - Endi otyn qozǵalysyn óndirý men tıeýden bastap, óńirlerge jetkizý jáne halyqqa satýǵa deıingi búkil tizbek boıynsha baqylaýǵa bolady.
Bul aýytqýlardy jedel anyqtaýǵa, táýekelderdi baǵalaýǵa jáne olardyń kómir jetkizilimine áser etýine deıin qajetti sharalardy qabyldaýǵa múmkindik beredi, dep habarlaıdy QR Energetıka mınıstrliginiń baspasóz qyzmeti.
Energetıka mınıstrliginiń Memlekettik energetıkalyq qadaǵalaý jáne baqylaý komıtetinde kommýnaldyq-turmystyq sektor men halyqty kómirmen qamtamasyz etý jónindegi Respýblıkalyq shtabtyń alǵashqy otyrysy ótti.
Shtab 2026–2027 jyldardaǵy jylytý maýsymy aıaqtalǵanǵa deıin jumysyn jalǵastyrady. Onyń negizgi mindeti – kómir qorlarynyń jetkilikti kólemin qamtamasyz etý, logıstıkanyń turaqty jumysyn jolǵa qoıý jáne búkil jylytý maýsymy boıy elimizdiń barlyq óńirlerine kómirdiń úzdiksiz jetkizilýin qamtamasyz etý.
2025–2026 jyldardaǵy jylytý maýsymynda óńirlerge shamamen 8,15 mln tonna kómir jetkizildi. Bul josparly kólemniń 109%-yn qurady. Al aldaǵy jylytý maýsymyna qajettilik 7,3 mln tonna kóleminde aıqyndaldy.
Jańa maýsymda jetkizilimderdi baqylaý biryńǵaı tsıfrlyq platforma arqyly kúsheıtiledi. Qazirgi ýaqytta elimizde 951 temirjol tuıyǵy jáne kómirdi ótkizýmen aınalysatyn 586 operator jumys isteıdi. Buǵan deıin jetkizý tizbeginiń ártúrli kezeńderi boıynsha aqparat birneshe derekkózden kelip túsken. Endi olardyń barlyǵy biryńǵaı júıege biriktiriledi.
Platforma kómir qozǵalysynyń – óndirý men tıeýden bastap tasymaldaý, qorlardy jınaqtaý jáne túpkilikti tutynýshyǵa ótkizýge deıingi búkil tizbeginiń biryńǵaı tsıfrlyq kórinisin qalyptastyrady. Naqty ýaqyt rejıminde kómir óndirý jáne tıeý kólemderi, kómirdiń qozǵalysy, tuıyqtar men qoımalardaǵy qorlar, baǵalar, sondaı-aq óńirler boıynsha josparlardyń oryndalýy baqylanady.
Júıe jetkizilimniń ártúrli kezeńderindegi derekterdi salystyrýǵa jáne aýytqýlardy jedel anyqtaýǵa múmkindik beredi. Mysaly, qordyń jetkiliksiz kólemi qalyptasqan, tıeý qarqyny tómendegen nemese jetkizý kestesiniń buzylý qaýpi týyndaǵan ýchaskelerdi anyqtaýǵa bolady. Bul másele túpkilikti tutynýshyǵa áser etpeı turyp, aldyn ala áreket etýge múmkindik beredi.
-Bizdiń mindetimiz – jetkizilimderdiń búkil tizbegin ashyq ári árbir kezeńde kórinetin etý. Eń bastysy – aýytqýlardy aldyn ala anyqtap, olardyń halyqty kómirmen qamtamasyz etýge áser etýine deıin qajetti sharalardy qabyldaý, – dedi Komıtet tóraǵasy Erjan Ertaev.
Aldaǵy ýaqytta platformanyń múmkindikterin jasandy ıntellekt elementteri arqyly keńeıtý josparlanyp otyr. Bul derekterdi tereńirek taldaýǵa jáne jetkizý tizbegindegi yqtımal táýekelderdi dálirek anyqtaýǵa múmkindik beredi.
Otyrys barysynda kómir óndirýshi kásiporyndardyń esepteri tyńdalyp, kómir óndirý, tıeý jáne óńirlerge jetkizýdiń qazirgi jaǵdaıy qaraldy. Otyrys qorytyndysy boıynsha negizgi mindetter aıqyndaldy.
Ákimdikterge kómir qorlaryna turaqty monıtorıng júrgizýdi, tsıfrlyq platformadaǵy aqparatty ýaqtyly jańartýdy jáne jetkizilimderge qatysýshylardyń barlyǵymen tıimdi ózara is-qımyldy qamtamasyz etý tapsyryldy.
Kómir operatorlary qoımalar men tuıyqtarda jetkilikti qor qalyptastyrýǵa, kómirdi úzdiksiz ótkizýdi jáne halyqqa tıisti qyzmet kórsetýdi qamtamasyz etýge, sondaı-aq suranys sharyqtaǵan kezeńde júktemeni arttyrýǵa daıyn bolýǵa tıis.
«Qazaqstan temir joly» UK» AQ-ǵa joǵary júkteme kezeńinde jartylaı vagondardy ýaqtyly berýdi jáne tasymaldaý ınfraqurylymynyń turaqty jumysyn qamtamasyz etý tapsyryldy.
Kómir óndirýshi kásiporyndar óńirlerdiń ótinimderin jáne qajetti tıeý kólemderin qamtamasyz etýge, sondaı-aq suranys artqan jaǵdaıda jetkizilim kólemin jedel ulǵaıtý múmkindigin saqtaýǵa tıis.
-Negizgi maqsat – halyqtyń búkil jylytý maýsymy boıy qajetti kólemdegi kómirdi ýaqytyly alýyn qamtamasyz etý. Tsıfrlyq monıtorıng jetkizilimderdiń búkil tizbegin kórýge jáne týyndaıtyn táýekelderge jedel áreket etýge múmkindik beredi. Ol úshin kómir óndirýshi kásiporyndar men tasymaldaýshylardan bastap operatorlar men óńirlerge deıin barlyq qatysýshylardyń úılesimdi jumysy qajet, – dep atap ótti Erjan Ertaev.
Osyǵan deıin Qazaqstanda kómir baǵasy 2022 jyldan beri qalaı ózgergeni týraly jazdyq.
