Energetıka mınıstrligi kómir salasyndaǵy máselelerdi sheshý úshin keshendi sharalar qabyldamaq
ASTANA. KAZINFORM — Energetıka mınıstri Erlan Aqkenjenov Úkimettegi baspasóz konferentsııasynda kómir salasynyń Energetıka mınıstrliginiń quzyryna berilý barysy men qordalanǵan máselelerdi sheshý baǵytynda qabyldanyp jatqan sharalar týraly aıtty.
Mınıstrdiń aıtýynsha, qazirgi tańda kómir salasy resmı túrde Energetıka mınıstrliginiń qaraýyna berilip jatyr. Negizgi baǵyttar boıynsha jedel jumys bastalyp, bar problemalar tereń taldanǵan.
— Basty qıyndyqtar bizge jaqsy tanys — jınalǵan bereshekter, logıstıkalyq kedergiler jáne ásirese jylytý maýsymy qarsańynda kómir jetkizýdi qatań baqylaý qajettiligi. Kómir — el energetıkasynyń negizgi tiregi, sondyqtan ony úzilissiz jetkizý — basty basymdyǵymyz, — dedi Erlan Aqkenjenov.
Sondaı-aq mınıstr salanyń iri kásiporyndarynyń qatysýymen ótken alǵashqy strategııalyq keńeste basym mindetter aıqyndalyp, turaqty monıtorıng tetigi iske qosylǵanyn atap ótti.
Jaqyn arada kómir salasyndaǵy jaǵdaıdy turaqtandyrý jáne ári qaraı damytý boıynsha keshendi is-qımyl jospary tanystyrylmaq.
Osyǵan deıin «QazaqGaz» ulttyq kompanııasy Energetıka mınıstrligine 2025 jyldyń birinshi jartyjyldyǵyndaǵy jumys nátıjeleri týraly esep berdi.