Energetıka mınıstrligi Kómir generatsııasyn damytýdyń ulttyq jobasyn ázirleýge kiristi

ASTANA. KAZINFORM – Energetıka mınıstrligi Prezıdenttiń Quryltaıda aıtqan Kómir generatsııasyn damytý jónindegi Ulttyq jobany ázirleý jáne bekitý tapsyrmasyn oryndaýǵa kiristi. Bul týraly sala mınıstri Erlan Aqkenjenov aıtty.

Atap aıtqanda, bul josparǵa shamamen 7,6 GVt kómir generatsııalaý jobalary engiziledi.

– Ekologııalyq zańnama talaptaryn saqtaı otyryp, «taza kómir» tehnologııalary negizindegi jańa kómir generatsııasy jobalaryna erekshe nazar aýdaramyz. Jalpy qýaty 960 MVt bolatyn Kókshetaý, Semeı jáne Óskemen qalalaryndaǵy 3 jylý elektr ortalyqtary jobalarynyń aıaqtalý merzimderi ózgermeıdi jáne olardyń iske asyrylýy mınıstrliktiń tolyq baqylaýynda, – dedi Energetıka mınıstri Úkimet otyrysynda.

Árbir joba kómir generatsııasyn damytý jóninde ázirlenip jatqan Ulttyq jobada egjeı-tegjeıli sıpattalady jáne tirkeletin bolady.

Sonymen birge, mınıstr 2026 jyl tsıfrlandyrý jáne jasandy ıntellekt jyly bolyp belgilengenin jáne osy salada birqatar iri jobalardy iske asyrý josparlanǵanyn jetkizdi.

– Joǵaryda aıtylǵandar negizinde mınıstrlik derekterdi óńdeý ortalyqtarynyń joǵary energııa syıymdylyǵyn eskerip, Jasandy ıntellekt jáne tsıfrlyq damý mınıstrligimen birlesip turaqty jáne senimdi elektrmen jabdyqtaýdy qamtamasyz etý maqsatynda, onyń ishinde qajet bolǵan jaǵdaıda ulǵaıtý jaǵyna jańa qýattardy engizý jónindegi josparlardy qaıta qaraıdy, – dedi E. Aqkenjenov.

Aıta keteıik, Memleket basshysy V Ulttyq quryltaıda Úkimetke 20 naýryzǵa deıin kómir óndirisin damytýdyń ulttyq jobasyn bekitýdi tapsyrdy.

Buǵan deıin Premer-mınıstr Oljas Bektenov «Samuryq-Qazynaǵa» qańtardyń sońyna deıin úsh qalada JEO salý máselesin sheshýdi mindettedi.