Bizde kómir boıynsha problema joq – Energetıka mınıstrligi

ASTANA. KAZINFORM – Energetıka mınıstriniń orynbasary Sanjar Járkeshev Úkimet otyrysynan keıin ótken baspasóz máslıhatynda jylytý maýsymyna qajet kómir qory jetkilikti ekenin aıtty. 

– Bizde kómir boıynsha problema joq. Jylytý kezeńine jaqsylap daıyndaldyq. Jalpy qazir 5,6 mln tonna kómir qory bar. Respýblıka boıynsha tapshylyq joq. Tek kómir ǵana emes, mazýt boıynsha da osyndaı jaǵdaı bar. Maýsymdy sátti ótkerýge qajetti 153 myń tonnaǵa jýyq mazýt jınaqtaldy. Bul 2024 jyldaǵy qormen salystyrǵanda 33 paıyzǵa kóp. Jalpy jylytý kezeńin aman-esen ótkizý úshin otyn qoryn kóbeıtip jatyrmyz, - dedi ol.

Vıtse-mınıstr kómir baǵasy ár óńirde ár túrli ekenin aıtady. 

– Negizinen tonnasyna 13-16 myń teńge bolyp tur. Keıbir temirjol tuıyqtarynda basqa baǵa bar ekenin estip jatyrmyz. Bul derbes naryq bolǵandyqtan ony biz rettemeımiz. Suranys pen usynysty qarasaq, baǵanyń kóteriletinin kórip otyrǵan joqpyz. Maksımaldy baǵa 20 myń teńgege barǵanyn estip jatyrmyz. Biraq bul óte sırek kezdesedi, - dedi Sanjar Járkeshev.

Astanada úıinde kómir jaǵatyn turǵyndarǵa ótemaqy tólenetinin jazǵan edik.