Energetıka mınıstrligi KQK jumysy tolyq toqtaıdy degen aqparatty joqqa shyǵardy
ASTANA. KAZINFORM — Qazaqstannyń Energetıka mınıstrligi Kaspıı qubyr konsortsıýmynyń (KQK) jumysy tolyq toqtaıdy degen aqparatqa túsinik berdi.
Buǵan deıin keıbir BAQ-ta KQK qyzmeti tolyǵymen toqtatylýy múmkin degen aqparat taraǵan edi. Alaıda vedomstvo mundaı stsenarıı qarastyrylyp otyrǵan joq ekenin málimdedi.
Mınıstrlik málimetinshe, 31 shilde kúni KQK munaı qubyrynyń jumysy ýaqytsha toqtatylǵan. Soǵan qaramastan júk jóneltýshilerden munaı qabyldaý jáne rezervýarlar parkin toltyrý jumystary jalǵasyp jatyr.
Energetıka mınıstrliginiń habarlaýynsha, 1 tamyzdan bastap KQK arqyly munaı qabyldaý kólemi táýligine 100 myń tonna bolady.
— Munaıdy tasymaldaý kólemin odan ári ulǵaıtý teńiz termınalynda tankerlerdiń tıeýge ýaqytyly qoıylýyna baılanysty bolady. Energetıka mınıstrligi KQK jáne júk jóneltýshilermen turaqty ózara is-qımyl júrgizip jatyr. Qalyptasqan jaǵdaı turaqty baqylaýda, — dedi mınıstrdiń keńesshisi, vedomstvonyń resmı ókili Ásel Serikpaeva.
Eske salaıyq, buǵan deıin KQK teńiz termınalynda dron shabýylynan keıin munaı tıeý ýaqytsha toqtatylǵanyn habarlaǵan edik.
