Energetıka mınıstrligi KQK termınalyndaǵy tankerge shabýyl týraly: eksporttyq resýrstarǵa zııan kelgen joq

ASTANA. KAZINFORM - Qazaqstan Respýblıkasy Energetıka mınıstrligi 2026 jylǵy 13 qańtarda Qara teńiz akvatorııasynda, Kaspıı qubyr konsortsıýmy teńiz termınaly mańynda Qazaqstannyń eksporttyq munaıyn tasymaldaýǵa qatysqan eki kemede tirkelgen keleńsiz oqıǵalar týraly aqparatty resmı túrde rastaıdy.

Mınıstrliktiń baspasóz qyzmetiniń habarlaýynsha, Malta týymen júrgen «Matilda» tankeriniń «QazMunaıGaz» ulttyq kompanııasynyń qosalqy uıymy arqyly jalǵa alynǵany jáne UUA shabýylyna ushyraǵany rastaldy. Kemede jarylys tirkelgenimen, órt shyqpaǵan. Ekıpaj arasynda zardap shekkender joq. Tehnıkalyq qyzmetterdiń aldyn ala baǵalaýyna sáıkes, tanker teńizde júzýge qabiletti, kemeniń korpýsynda asa qaýipti zaqymdanýlar anyqtalmaǵan.

Lıberııa týymen júrgen «Delta Harmony» tankeri de júkteý jumystaryna daıyndyq kezeńinde ushqyshsyz ushý apparaty shabýylyna ushyraǵany rastaldy.

Saldarynan órt shyǵyp, jedel sóndirilgen. Ekıpaj músheleri zardap shekken joq. Operatıvtik shtab derekterine sáıkes, oqıǵa kezinde kemege munaı tıeý jumystary júrgizilmegen, júk tsısternalary bos bolǵandyqtan, Qazaqstan Respýblıkasynyń eksporttyq resýrstaryna zııan keltirilmegen.

Energetıka mınıstrligi logıstıkalyq tizbekterdiń qaýipsizdigin qamtamasyz etý jáne eksporttyq jetkizilimderdiń úzdiksiz jumysyn qamtamasyz etý maqsatynda «QazMunaıGaz» ulttyq operatorymen, konsortsıým ákimshiligimen jáne kemeler ıelerimen is-qımyldardy jedel túrde úılestirip otyr.

Osyǵan deıin QazMunaıGaz KQK termınalyndaǵy tankerge jasalǵan shabýylǵa qatysty pikir bildirgen bolatyn.