Energetıka mınıstrligi KQK-degi munaı jóneltý jaǵdaıyna qatysty málimdeme jasady
ASTANA. KAZINFORM — Qazaqstan Respýblıkasy Energetıka mınıstrligi qazirgi ýaqytta KQK termınalynda munaı jóneltý ShAQ-1 (VPÝ) aılaq qurylǵysy arqyly júzege asyrylyp jatqanyn habarlady.
— Tehnologııalyq protsess akvatorııadaǵy aǵymdaǵy aýa raıyna baılanysty engizilgen túzetýlerdi eskere otyryp, shtattyq rejımde júrgizilip jatyr. Vedomstvonyń negizgi basymdyǵy eksporttyq jetkizilimderdiń turaqtylyǵyn qamtamasyz etý, sondaı-aq saqtaý qýattarynyń shamadan tys tolyp ketýine jol bermeý, — delingen habarlamada.
Mınıstrlik jaǵdaıdy turaqty baqylaýda jáne halyqaralyq seriktestermen, konsortsıým operatorymen tikeleı baılanysta otyrǵanyn habarlady.
Eske sala keteıik, mınıstrlik Ózbekstanda qazaqstandyq munaıdan áýe otyny óndirilgeni týraly aqparatty joqqa shyǵarǵan bolatyn.