Energetıka mınıstrligi Qashaǵan jobasynyń sot isine baılanysty resmı túsinik berdi

ASTANA. KAZINFORM – Energetıka mınıstrligi Qashaǵan jobasynyń sot isi týraly halyqaralyq BAQ-ta taraǵan málimet týraly resmı túsinik berdi.

- Qazaqstandaǵy munaı-gaz jobalaryn iske asyrýǵa baılanysty sot isine qatysty BAQ-ta jarııalanǵan materıaldar boıynsha mynany aıtamyz. Osy máselege qatysty mınıstrlik halyqaralyq arbıtraj protsesterine tán qupııalylyq qaǵıdattaryn qatań saqtaı otyryp áreket etedi. Ulttyq múddeni qorǵaý baǵytyndaǵy barlyq shara halyqaralyq quqyq normalaryna saı júrgizilip jatyr. Quqyqtyq rásimder tolyq aıaqtalǵannan keıin resmı aqparat usynylady, - dep jazady mınıstrlik mamandary.

Aıta ketý kerek, Bloomberg basylymy Qazaqstan qashaǵan jobasynyń aınalasyndaǵy sot isi boıynsha 15 mln dollar talap etip otyrǵanyn jazǵan edi. Materıalda resmı Astananyń Hıýston men Italııadaǵy qylmystyq isterde shyqqan materıaldarǵa súıenip Shveıtsarııada sot talabyn túsirgeni aıtylǵan. Bul derekterdi Qazaqstan ıtalııalyq Eni kompanııasy operator bolyp esepteletin Qashaǵan munaı kenishiniń aınalasyndaǵy tórelik iste óz ustanymyn nyǵaıta túsý úshin paıdalanýdy kózdeıtini de jazylǵan.

Bloomberg-tiń jazýynsha, Qazaqstan AQSh-taǵy iste «QazMunaıGaz» ben Eni kompanııalarynda top-menedjer bolǵan Maqsat Idenovtiń tergelýine qol jetkizgen. Biraq sýdıa atalǵan tulǵanyń bergen jaýaby tek Shveıtsarııadaǵy protseste ǵana qoldanatyndaı shekteý qoıyp otyr.

AQSh-taǵy iste Eni merdigerlerine Qazaqstandaǵy servıstik kelisimsharttardyń qunyn qoldan ósirý úshin zańsyz shemalar uıymdastyrdy degen aıyp taǵylǵan.