Energetıka mınıstrligi gaz jobalaryn jedeldetýdi kózdep otyr
ASTANA. KAZINFORM – «QazaqGaz» ulttyq kompanııasy Energetıka mınıstrligine 2025 jyldyń birinshi jartyjyldyǵyndaǵy jumys nátıjeleri týraly esep berdi. Negizgi kórsetkishterdiń óskenin jáne aldaǵy jylytý maýsymyna gaz tasymaldaý júıesiniń tolyq daıyn ekenin kórsetti.
Jıynda elimizdiń energetıkalyq qaýipsizdigi men ekonomıkalyq bolashaǵy úshin asa mańyzdy strategııalyq jobalardy belsendi iske asyrý máseleleri talqylandy.
Alty aı ishinde kompanııa gaz júrgizý josparyn artyǵymen oryndap, tutynýshylarǵa 13,3 mıllıard tekshe metr gaz jetkizdi. Sonymen qatar mınıstrlik málimetinshe, Qytaıǵa tranzıt kólemin arttyrý boıynsha tabysty kelissózderdiń arqasynda eksport kólemi 6 paıyzǵa ósip, 2,4 mıllıard tekshe metrge jetti.
– «QazaqGaz elimizdiń energetıkalyq turaqtylyǵyn qamtamasyz etýde strategııalyq mańyzdy ról atqarady. Biz damý qarqynyn odan ári saqtap, ınnovatsııalyq sheshimderdi engizýimiz kerek, seriktestermen ashyq ári syndarly dıalogty jalǵastyrýymyz qajet. Kompanııa ujymy qazirgi mindetterdi joǵary deńgeıde atqaryp otyr. Endi biz barlyq kúsh-jigerimizdi Qazaqstannyń gaz sýverenıtetin ondaǵan jyldarǵa aıqyndaıtyn jobalarǵa jumyldyrýymyz kerek, – dedi Energetıka mınıstri Erlan Aqkenjenov.
Aldaǵy maqsattarǵa jetý úshin QazaqGaz kompanııasy birqatar iri jobalarǵa basymdyq berip otyr. Solardyń ishinde eń negizgisi – Qashaǵan ken ornynda jańa gaz óńdeý zaýytyn iske qosý.
Bul joba ımportqa táýeldilikti azaıtýdyń naqty joly bolmaq. Sonymen birge halyq tyǵyz ornalasqan óńirlerdi úzdiksiz gazben qamtý úshin «Beıneý – Bozoı – Shymkent» magıstraldi gaz qubyrynyń ekinshi jelisiniń qurylysy qarqyn aldy.
Oǵan qosa, Jetisý oblysyn kógildir otynmen qamtýǵa baǵyttalǵan áleýmettik mańyzdy joba «Taldyqorǵan – Úsharal» gaz qubyrynyń qurylysy aıaqtalýǵa jaqyn. Sondaı-aq elimizdiń aımaqtyq energetıkalyq hab retindegi rólin aıqyndaıtyn «Orta Azııa – Ortalyq» tranzıttik magıstralin jańǵyrtý jumystary jalǵasyp jatyr.
Basqosý sońynda mınıstr jobalar boıynsha negizgi kelisimsharttardy aıaqtaý, mańyzdy ınvestıtsııalyq sheshimderdi qabyldaý jáne uzaqmerzimdi gaz ımporty boıynsha kelissózderdi jedeldetý jóninde naqty tapsyrmalar berdi. Bul elimizdiń jańa gaz strategııasynyń josparlaý kezeńinen onyń naqty júzege asyrylý kezeńine ótkenin kórsetedi.
Aıta keteıik, Energetıka mınıstrligi suıytylǵan gaz baǵasyn 1 tamyzdan bastap ózgertýdi usyndy.