Energetıka mınıstrligi elektr qýaty tarıfine túsinik berdi
ASTANA. KAZINFORM – QR Energetıka vıtse-mınıstri Suńǵat Esimhanov elimizdegi elektr energııasy boıynsha tapshylyq týraly suraqqa jaýap berdi.
Búgin Senatta tilshiler mınıstrlik ókilderinen elektr energııasyndaǵy tarıftiń ózgerý múmkindigi týraly suraq qoıdy. Óz kezeginde S.Esimhanov Energetıka mınıstrligi elektr stantsııalarynyń elektr energııasyn óndirýge arnalǵan tarıfterin ǵana bekitetinin eske saldy.
- Ony jylyna bir ret qaraımyz jáne jyl saıyn osy ózgerister bolyp jatady. Bıylǵy 1 aqpannan bastap stantsııalardaǵy tarıfter ortasha eseppen 20 paıyzǵa kóterildi. Jylyna bir ret qarastyrýdyń ózindik sebepteri bar. Bul rette shıkizatqa tarıfterdiń ósýi bar, ıaǵnı kómir qymbattady, qosalqy bólshekterdiń baǵasy ósti, sebebi ınflıatsııalyq protsester júrip jatyr, - dedi vıtse-mınıstr.
Onyń aıtýynsha, tarıftiń ózgerýine kadr máselesi yqpal etti. Óıtkeni stantsııalardaǵy jalaqy birtindep kóterilip jatyr. Búginde stantsııalardaǵy óndiristik kadrlardyń ortasha jalaqysy 400-420 myń teńgege deıin ósti. Buǵan qosa, atalǵan nysandarǵa joǵary sapaly jabdyqtar satyp alyndy.
- Jylý men elektr energııasynyń bólshek saýda naryǵyndaǵy tarıfterdi Tabıǵı monopolııalardy retteý komıteti (Ulttyq ekonomıka mınıstrligi) bekitedi. Biz atalǵan vedomstvomen birge jumys istep jatyrmyz. Sondyqtan aı saıyn tarıfter kóteriledi degen mindet joq. Olardyń da belgili bir erejeleri bar. Josparly túrde tarıfter kóteriledi, sonymen qatar ataýly áleýmettik kómek máseleleri de qarastyrylady, - dedi Suńǵat Esimhanov.
Eske salsaq, Qazaqstandyq 36 elektr energııasyn óndirýshi uıym Energetıka mınıstrligine 2025 jylǵy 1 aqpannan bastap elektr energııasyn óndirýge arnalǵan shekti tarıfti túzetýge qatysty ótinim bergenin jazǵan edik.