Energetıka mınıstrligi Ekibastuzda jańa elektr stantsııasyn salýǵa tender jarııalady

ASTANA. KAZINFORM — QR Energetıka mınıstrligi Ekibastuz qalasynda (Solnechnyı kenti) qýattylyǵy 2640 MVt bolatyn jańa kondensatsııalyq elektr stantsııasyn salýǵa tender jarııalady.

Joba elimizdegi ornyqty energetıkany damytýǵa baǵyttalǵan. Ol jańa generatsııalyq qondyrǵylardy salyp, olardy paıdalanýǵa berýdi kózdeıdi. Zańnamaǵa sáıkes, bul tenderlik tetik elektr qýaty naryǵy arqyly ınvestıtsııanyń qaıtarymyn qamtamasyz etedi.

Tenderdiń nátıjesi boıynsha elektr qýatyn qoldaý qyzmetine arnalǵan jeke tarıf belgilenedi. Bul tarıfke mynalar kiredi:

• negizgi kapıtal shyǵyndarynyń ótemi;

• jobany júzege asyrý úshin tartylǵan nesıeler boıynsha syıaqy;

• ınflıatsııa deńgeıine jyl saıyn ındeksatsııalanatyn ınvestıtsııalanǵan kapıtalǵa rentabeldilik mólsheri.

Ótinimderdi qabyldaý ýaqyty:
Bastalýy – 2025 jylǵy 25 sáýir, saǵat 09:00,
Aıaqtalýy – 2025 jylǵy 12 mamyr, saǵat 15:00,
(Astana ýaqytymen).

Jobany iske asyrý elimizdiń energetıka salasyn damytýǵa eleýli úles qosady, Qazaqstannyń halyqaralyq bedelin arttyrady jáne ornyqty damý (ESG) qaǵıdattaryna adaldyǵyn aıqyndaıdy.

Aıta keteıik, buǵan deıin Úkimette energetıkalyq jobalardy iske asyrý barysy qaralǵan bolatyn.