Energetıka mınıstrligi benzın men gaz baǵasyna qatysty shaǵymdardy qabyldaıtyn jeli ashty
ASTANA. KAZINFORM – Energetıka mınıstrligi benzın men dızel otynyna qoıylǵan baǵalyq moratorııdiń buzylýy, sondaı-aq keıbir janarmaı quıý stantsııalaryndaǵy suıytylǵan munaı gazynyń (avtogazdyń) qoljetimdiligi boıynsha azamattardyń ótinishterin tirkep jatyr.
Bul týraly búgin mınıstrliktiń baspasóz qyzmeti habarlady.
-Mınıstrlik Básekelestikti qorǵaý jáne damytý agenttigimen jáne óńirlik shtabtarmen birlesip, alypsatarlyq pen otynnyń jasandy tapshylyǵyn týǵyzýǵa baǵyttalǵan kez kelgen áreketterge qatań tosqaýyl qoıady. Benzın men dızel otyny boıynsha mınıstrlik barlyq qajetti otyn kólemi óńirlerdiń ótinimderine sáıkes jóneltilip, munaı bazalarynda saqtalyp turǵanyn atap ótedi. Tapshylyqqa sebep bolatyn obektıvti faktorlar joq,-dep málimdedi mınıstrliktiń baspasóz qyzmeti.
Suıytylǵan munaı gazy boıynsha óndirýshi zaýyttardyń birinde júrgizilgen josparly jóndeý jumystary mınıstrlik tarapynan aldyn ala eskerilip, joǵary suranys baıqalatyn óńirler úshin qosymsha kólemder bólindi. Sondyqtan keıbir gaz quıý beketterindegi kezekter júıeli tapshylyqpen emes, ishki bólý jáne logıstıka máselelerimen baılanysty.
-Eger siz AI-92 markaly benzın baǵasynyń negizsiz qymbattaýy nemese AJQS-ta otynnyń bolmaýy sııaqty jaǵdaılarǵa tap bolsańyz, jedel jeli telefonyna habarlasýyńyzdy suraımyz: +77018550248. Qońyraýlar táýlik boıy 24/7 formatynda qabyldanady. Árbir ótinish muqııat qaralyp, rastalǵan jaǵdaıda adal emes naryq qatysýshylaryna qatysty tıisti sharalar qabyldanady,-delingen habarlamada.
Osyǵan deıin Energetıka mınıstri Erlan Aqkenjenovtyń benzınniń baǵasynyń ósýine jol berilmeıtini týraly aıtqanyn jazdyq.