Energetıka mınıstrligi benzın máselesin baqylaýda ustap otyr
ASTANA. KAZINFORM — Energetıka mınıstrligi elimizdi AI-95 markaly benzınmen qamtamasyz etý máselesin baqylaýda ustap otyr. Qazirgi tańda maýsymdyq suranystyń artýy baıqalady. Osyǵan baılanysty mınıstr Erlan Aqkenjenov «QazMunaıGaz» AQ basshylyǵymen, iri janarmaı quıý stantsııalarynyń (JQS) ókilderimen jáne munaı ónimderin jetkizýshilermen keńes ótkizdi.
Kezdesý barysynda elimiz boıynsha AI-95 benzıniniń qory 67 myń tonnany quraıtyny aıtyldy. Bul 16 kúndik tutyný deńgeıine sáıkes keledi. Qor jedel túrde tolyqtyrylyp otyrady, oǵan otandyq munaı óńdeý zaýyttarynyń kúndelikti óndirisi negiz deýge bolady.
2025 jylǵy shilde aıynda tutyný deńgeıi ótken jylmen salystyrǵanda 18%-ǵa ósti. Tamyz aıynda da suranystyń odan ári artýy kútilýde. Osyǵan baılanysty Energetıka mınıstri Úkimettiń basty mindeti — qazaqstandyqtardy tapshylyq pen baǵanyń turaqsyzdyǵynan qorǵaý ekenin atap ótti.
— Suranystyń maýsymdyq artýy — shtattyq jáne aldyn ala boljanǵan jaǵdaı. Úkimet bul protsesti tolyq baqylaýda ustap otyr. Men naryqtyń barlyq qatysýshylarynan otynnyń úzdiksiz jetkizilýin qamtamasyz etýdi jáne alypsatarlyq áreketterdi boldyrmaýdy talap etemin. Azamattar úshin benzın tapshylyǵy bolmaıdy. Bul másele — Úkimettiń tikeleı baqylaýynda, — dedi Energetıka mınıstri.
Keńes qorytyndysy boıynsha mınıstr munaı bazalary men JQS-tarda AI-95 benzıniniń eń tómengi qorlaryn qamtamasyz etý, óńirlerge úzdiksiz jetkizý úshin benzın tasymalyna ýaqtyly kelisimsharttar jasaý, kez kelgen yqtımal táýekelder týraly mınıstrlikke jedel habarlaý týraly naqty tapsyrmalar júktedi.
Energetıka mınıstrligi benzın naryǵyna qatysýshylardyń jumysyn kúndelikti úılestirýdi jalǵastyrady. Maqsat — barlyq qazaqstandyqtar úshin benzın baǵasynyń turaqtylyǵy men boljamdy qajettilikterdi qamtamasyz etý.
Eske sala keteıik, buǵan deıin memlekettik retteýdi alyp tastaǵannan keıin, AI-92 benzıniniń baǵasy birtindep ósip kele jatqanyna qaramastan, Energetıka mınıstrligi baǵanyń kúrt ósýine jol berilmeıtinin aıtqan edi.