Energetıka mınıstrligi: Astanada jáne óńirlerde gaz tapshylyǵy bolmaıdy

ASTANA. KAZINFORM — Orynbor gaz óńdeý zaýyty jumysynyń toqtatylýy Qazaqstanǵa gazdyń jetkizilýine keri áserin tıgizgen joq, dep habarlaıdy Energetıka mınıstrliginiń baspasóz qyzmeti.

Energetıka mınıstrligi Orynbor gaz óńdeý zaýytynda (GÓZ) shıkizat qabyldaý ýaqytsha toqtatylýynan týyndaǵan jaǵdaıǵa baılanysty resmı túsinikteme jasady. 

Vedomstvo atap ótkendeı, BAQ pen áleýmettik jelilerde taralǵan «Astana men basqa da óńirlerde gaz tapshylyǵy bolýy múmkin» degen aqparat shyndyqqa janaspaıdy.

— Qazir eldiń gazdandyrylǵan óńirlerine, sonyń ishinde elordaǵa gaz qalypty rejımde, tolyq kólemde jáne esh shekteýsiz jetkizilip keledi. Gaz jetkizýdiń turaqtylyǵy aldyn ala qarastyrylǵan rezervtik tetikter esebinen qamtamasyz etilip jatyr. Jetkizilmegen gaz kólemi qoldanystaǵy kelisimshart aıasynda jedel túrde tolyqtyrylýda. Sondyqtan ishki tutynýshylarǵa, onyń ishinde elordalyq JEO-da gaz tapshylyǵy joq jáne bolashaqta da bolmaıdy, — delingen habarlamada.

Mınıstrlik málimetinshe, seriktesterdiń aqparatyna sáıkes, jaqyn arada Orynbor GÓZ-de gaz qabyldaý qaıta bastalady dep kútilip otyr. 

— Ýaqytsha shekteýlerge baılanysty Qarashyǵanaq ken ornynyń operatory óndirý kólemin baqylaýly túrde azaıtty. Atalǵan shara Qazaqstannyń ishki naryǵyna gaz jetkizý mindettemelerine áser etpeıdi. GÓZ qalypty jumysyna kóshkennen keıin óndiris kólemi josparlanǵan deńgeıde qaıta jalǵasady. Qarashyǵanaqta gaz óńdeý zaýytyn salý máselesi Úkimettiń strategııalyq basymdyqtarynyń biri bolyp tabylady jáne pysyqtalý ústinde, — dep túsindirdi vedomstvo.

Energetıka mınıstrligi azamattar men BAQ-ty tek resmı aqparatqa senýge jáne jalǵan aqparattarǵa jol bermeýge shaqyrady. Atalǵan jaǵdaı Qazaqstan Respýblıkasy Úkimetiniń turaqty baqylaýynda.

Eske salsaq, 2025 jylǵy 19 qazanda Orynbor gaz óńdeý zaýytyna ushqyshsyz áýe apparatynyń shabýyly saldarynan apatty jaǵdaı tirkelgen. Sonyń saldarynan zaýyt Qarashyǵanaq ken ornynan shıkizat gaz qabyldaýdy ýaqytsha toqtatqan.