Energetıka mınıstrligi áleýmettik áriptestik boıynsha jańa qujat ázirlep jatyr
ASTANA. KAZINFORM — QR Energetıka mınıstrligi 2026–2028 jyldarǵa arnalǵan munaı-gaz, munaı óńdeý jáne munaı-gaz hımııasy salalaryndaǵy áleýmettik áriptestik týraly jańa Salalyq kelisimniń negizgi parametrlerin talqylaýdy bastady.
Mınıstr Erlan Aqkenjenovtiń tóraǵalyǵymen ótken keńeske «QazMunaıGaz», «QazaqGaz» ulttyq kompanııalarynyń basshylary, «KAZENERGY» qaýymdastyǵynyń ókilderi men salalyq kásipodaq jetekshileri qatysty. Basqosýda jańa qujat boıynsha ortaq ustanym qalyptasyrý máselesi talqylandy.
Strategııalyq mańyzy bar salasyndaǵy eńbek qatynastaryn retteıtin qoldanystaǵy úsh jyldyq salalyq kelisim 2025 jyldyń sońynda aıaqtalady. Jańa qujatty ázirleý boıynsha dıalogty erte bastaý — sharttardy júıeli ári asyqpaı kelisýge múmkindik beredi. Bul óz kezeginde saladaǵy turaqtylyq pen aldyn ala boljam jasaýdy qamtamasyz etýge septigin tıgizedi. Qazirgi tańda bolashaq qujattyń negizgi bólimderi kelisilgen. Oǵan kompanııa men kásipodaq ókilderinen quralǵan jumys tobyndaǵy 100-den astam maman atsalysqan.
Qosymsha talqylaýdy qajet etetin negizgi másele — eńbekaqy tóleý mehanızmderi. Energetıka mınıstrligi bul baǵytta moderatorlyq qyzmet atqarýda. Jumys berýshilerdiń ekonomıkalyq múmkindikteri men qyzmetkerlerdiń áleýmettik talaptaryn saı tıimdi, ortaq sheshim tabýǵa arnalǵan ashyq dıalog alańyn usynýda.
Jıynda Erlan Aqkenjenov jańa qujat elimiz úshin asa mańyzdy salanyń aldaǵy úsh jyldyq turaqtylyǵynyń negizi ekendigin erekshe atap ótti. Qazirdiń ózinde úlken daıyndyq jumystary júrgizilgendigin aıtyp, konstrýktıvti kózqarastary úshin kompanııalar men kásipodaq ókilderine alǵysyn bildirdi.
— Eńbekaqy máseleleri árkez túıitkildi taqyryptardyń biri. Bizdiń ortaq mindetimiz — kásiporyndardyń ekonomıkalyq múmkindikteri men myńdaǵan qazaqstandyqtardyń áleýmettik kepildikteri arasynda ádil tepe-teńdik ornatý. Mınıstrlik dıalogtyń nátıjeli ótýi úshin barlyq qajetti jaǵdaıdy jasap, qujattyń naqty ári tıimdi damý quralyna aınalýyn qamtamasyz etedi, — dedi mınıstr.
Kezdesý qorytyndysy boıynsha taraptar daýly máselelerdi kelisýdiń kelesi kezeńine ótýge ýaǵdalasty. Endigi jumystar áleýmettik áriptestik jónindegi Salalyq komıssııa deńgeıinde jalǵasady. Bul qujatty tolyq aıaqtap, belgilengen merzimde qol qoıýǵa daıyndaýǵa múmkindik beredi.
Budan buryn Energetıka mınıstrligi «Jer qoınaýyn paıdalanýshylardyń jáne olardyń merdigerleriniń kómirsýtekterdi barlaý nemese óndirý jónindegi operatsııalardy júrgizý kezinde paıdalanylatyn taýarlardy, jumystardy jáne kórsetiletin qyzmetterdi satyp alý qaǵıdalaryna» ózgerister engizdi.