Energetıka mınıstri jýrnalısterden qazaq tilin úırenýge jarty jyl surady

ASTANA. QazAqparat – Energetıka mınıstri Almasadam Sátqalıev Úkimet otyrysynan keıin jýrnalısterden qazaq tilin úırenýge jarty jyl ýaqyt surady, dep habarlaıdy QazAqparat tilshisi.

BAQ ókilderi Úkimet otyrysynan keıin Almasadam Sátqalıevten qoıǵan suraqtardyń bárine nelikten tek orys tilinde jaýap beretinin surady.

«Árıne, men ana tilimdi bilemin. Biraq maǵan tildi bilý deńgeıimdi kóterý kerek. Maǵan jarty jyl berińiz. Sizdiń qazaqsha suraqtaryńyzdyń bárine jaýap beretin bolamyn. Jaýap sapaly bolý úshin oryssha berip turmyn», - dedi mınıstr.

Aıta keteıik, búgin Almasadam Sátqalıev Úkimet otyrysynda Energetıka mınıstri retinde resmı ant berdi.