Energetıka mınıstri janarmaı baǵasynyń qymbattaýyna qatysty pikir bildirdi
«Bizdiń aýyl sharýashylyǵy taýaryn óndirýshilerge jylyna 800 myń tonna janarmaı kerek. Árıne, egis jáne oraq naýqandary bar. Artylǵan kólemge qatysty aıtsaq, birshama jaqsy mólsher bar. Qyrkúıek aıynda mólsherlemeler tómendeı bastady da, tapshylyq paıda boldy. Qazan aıynan bastap artylǵan kólemniń mólsheri óse bastady jáne búginde bizde 240 myń tonnadan asyp otyr. Bul janarmaımen qamtamasyz etýde eshqandaı qıyndyqtar boldyrmaý úshin jetkilikti kólem», - dedi Maǵzum Myrzaǵalıev ortalyq kommýnıatsııalar qyzmetinde ótken brıfınginde.
Sondaı-aq, ol, janar-jaǵarmaı baǵasy munaıdyń baǵasyna tikeleı baılanysty ekenin eske saldy.
«Baǵaǵa keletin bolsaq, meniń oıymsha, búgingi tańda janar-jaǵar maı baǵasynyń qymbattaýyna negiz bolatyn úlken alǵysharttar joq. Degenmen, janar-jaǵarmaı baǵasynyń qalyptasýyna munaı baǵasy da áser etetinin aıtý kerek. Keıingi aptada bir barrel munaıdyń baǵasy 10% nemese 71 dollardan 78 dollarǵa deıin óskenin kórip otyrmyz. Sondyqtan janar-jaǵar maı baǵasyn boljaý – berekesiz sharýa. Óıtkeni biz munaı baǵasynyń qalaı bolatynyn bilmeımiz», - dep túsindirdi Energetıka mınıstri.
