Energetıka mınıstri soltústik óńirge gaz tartý jobasy jaıynda túsinik berdi
«Úkimet basymdyq berip otyrǵan jumystardyń biri - eldiń soltústik jáne shyǵys aımaqtaryn gazdandyrý. Ortalyq jáne soltústik óńirlerge gaz tartý maqsatynda 2019 jyly «Beıneý-Bozoı-Shymkent» qubyrynan gaz alatyn «Saryarqa» qubyrynyń birinshi kezeńi iske asyryldy.
2022 jylǵy maýsymda «AstanaGaz QMG» aktsıonerlik qoǵamy «Saryarqa» qubyrynyń 2 jáne 3-kezeńiniń qurylysy boıynsha tehnıkalyq ekonomıkalyq qujatty ázirledi. Onyń aıasynda quny 188,5 mlrd teńge bolatyn Aqmola jáne Soltústik Qazaqstan oblystaryna gaz tartý jobasy eskerilgen. Alaıda, byltyrǵy jylý berý maýsymynda gazdy ishki tutynýdyń kúrt artýyn eskere otyryp, «Beıneý-Bozoı-Shymkent» 106 paıyzǵa júkteldi, ıaǵnı jobalyq múmkindikten tys jumys istedi», - dedi A. Sátqalıev Soltústik Qazaqstan oblysynyń turǵyndarymen kezdesý kezinde.
Onyń aıtýynsha, QazaqGaz «Beıneý-Bozoı-Shymkent» baǵytynda ekinshi jelini jobalaý boıynsha jumysty bastady. Onyń aıaqtalý merzimi osy jyldyń sońyna deıin belgilendi. Jobany 2027 jyldyń sońyna deıin iske asyrý josparlanyp otyr.
Budan buryn habarlanǵandaı, Petropavldaǵy JEO-ny jóndeýge 5 mlrd teńgeden astam ınvestıtsııa salynbaq.
Búgin Soltústik Qazaqstan oblysynyń turǵyndarymen kezdesý kezinde Energetıka mınıstri Almasadam Sátqalıev aldaǵy kúzdegi jylý berý kezeńine daıyndyq jaıynda túsinik berdi.
