Energetıka mınıstri: «Saryarqa» gaz qubyrynyń 2-3 kezeńderin salý pysyqtalýda
«Ótken jyldyń jeltoqsan aıynda Elbasymyzdyń «Besinshi áleýmettik bastamasyna» sáıkes uzyndyǵy 1061 shaqyrym bolatyn «Saryarqa» magıstraldyq gaz qubyrynyń І kezeńi paıdalanýǵa berildi. Qyzylorda oblysynan bastaý alatyn «Saryarqa» gaz qubyrynyń І kezeńi elordany, ortalyq jáne soltústik óńirlerdiń bir bóligin ekologııalyq taza otyn túrimen qamtamasyz etýge múmkindik beredi. Bul táýelsizdik alǵan sátten bastap elimiz úshin mańyzdy tarıhı oqıǵalardyń biri bolyp sanalady. Soltústik óńirlerdi gazdandyrý úshin «Saryarqa» magıstraldyq gaz qubyrynyń 2 jáne 3 kezeńderin salý máselesi pysyqtalýda«, - dedi Nurlan Noǵaev.
Onyń aıtýynsha, halyqqa gaz berý úshin «Saryarqa» magıstraldyq gaz qubyrynyń 1-shi kezeńiniń trassasy boıynda Nur-Sultan qalasynda, Qaraǵandy jáne Aqmola oblystarynda gaz taratý jelileriniń qurylysy júrgizilýde.
«Elordany gazdandyrý 3 kezekke bólingen. Qazirgi ýaqytta ákimdik 9 iske qosý kesheni bar 1-shi kezektiń qurylysyn júrgizýde. Elordany gazdandyrýdyń 2 jáne 3 kezegi boıynsha qazirgi ýaqytta jobalaý jumysy júrgizilýde. Qaraǵandy oblysynda avtomattandyrylǵan gaz taratý stansalarynan Qaraǵandy, Temirtaý jáne Jezqazǵan qalalaryna burý men taratý jelilerin salý qarastyrylǵan. Barlyq úsh qalada 1-kezektegi bir iske qosý keshenderi boıynsha qurylys-montajdaý jumystary júrgizilýde»,- dedi ol.
Mınıstr Aqmola oblysynda gaz taratý jelileriniń qurylysy
2 kezekke bólingenin aıtady.
«1-shi kezekte Arshaly jáne Tselınograd aýdandarynyń 20 eldi mekenin gazdandyrý úshin 13 jobany iske asyrý qarastyrylǵan. Gazdandyrýdyń 2-shi kezeginiń nysandary jobalaý satysynda», - dedi ol.
