Energetıka mınıstri Reseıden gaz tartýdyń ońtaıly marshrýttaryn atady

NUR-SULTAN. QazAqparat – Soltústik óńirler men ShQO-ny gazdandyrý boıynsha Energetıka mınıstrligi 2 nusqany qarastyryp otyr. Bul týraly QR Energetıka mınıstri Bolat Aqsholaqov aıtyp berdi, dep habarlaıdy QazAqparat tilshisi.

«Birinshi nusqa – Reseı Federatsııasynan gaz tartý. Bul nusqa qazaqstandyq-reseılik jumys tobynyń sheńberinde qarastyrylýda. Mınıstrlik ákimdiktermen birlesip, gazdandyrýdyń nusqalaryn qaraý úshin tutynýdyń shamadaǵy kólemin anyqtap, reseılik tarapqa joldady. Sondaı-aq gaz qubyrlarynyń ońtaıly marshrýttary anyqtaldy, bul – uzyndyǵy shamamen 1 myń shaqyrym «Barnaýyl – Rýbtsov – Semeı – Óskemen - Pavlodar qalasynda tarmaqtalýy» jáne 644 shaqyrym bolatyn «Esil – Petropavl – Kókshetaý – Nur-Sultan», - dedi Bolat Aqsholaqov Úkimet otyrysynda.

Mınıstrdiń aıtýynsha, qazir reseılik tarap esep júrgizip jatyr, ony bıylǵy ekinshi toqsanda alý boljanǵan.

«Sondaı-aq biz ShQO men soltústik óńirlerdi Reseı Federatsııasynan suıytylǵan tabıǵı gazdy jetkizý arqyly gazdandyrý nusqasyn zerttep jatyrmyz. Bul rette ol úshin komprımırleý men qaıta gazdandyrýdyń tıisti ınfraqurylymyn salý jáne qurylysqa tıisti ınvestıtsııalar salý talap etiletinin atap ótken jón», - dedi Energetıka mınıstri.

Sondaı-aq, gazdandyrýdyń taǵy bir balamaly nusqasy – gazdy «Saryarqa» magıstraldyq gaz qubyrynan berý bolyp otyr.

«Qazirgi tańda «AstanaGaz QMG» AQ Aqmola jáne Soltústik Qazaqstan oblystaryn gazdandyrýdy kózdeıtin «Saryarqa» MGQ-nyń 2-3-kezeńderin salý boıynsha tehnıkalyq-ekonomıkalyq negizdemeni túzetti. Memlekettik saraptama maýsym aıynda shyǵýy múmkin. alýdyń kútiletin merzimi – bıylǵy maýsym. «AstanaGaz QMG» aqparaty boıynsha, materıaldardyń qymbattaýyn eskere otyryp, uzyndyǵy 483 km bolatyn «Saryarqa» MGQ-nyń 2-3 kezeńderin salý quny - shamamen 165 mlrd teńge», - dedi Bolat Aqsholaqov.