Energetıka mınıstri munaıgaz-hımııa óndirisi kórsetkishiniń tómendeý sebebin aıtty

NUR-SULTAN. QazAqparat – Áýe otyny boıynsha kórsetkish 131 myń tonnaǵa teń. Bul týraly Úkimet otyrysynda bıylǵy qańtar-naýryz aılarynyń qorytyndysy boıynsha otyn-energetıka keshenin talqylaý kezinde QR Energetıka mınıstri Nurlan Noǵaev málim etti, dep habarlaıdy QazAqparat tilshisi.

«Áýe otyny boıynsha kórsetkish 131 myń tonnaǵa teń, ıaǵnı bıylǵy qańtar-naýryz aılarynyń josparyna 100,6 paıyzdy qurady. Mazýt óndirisine toqtalatyn bolsam, onyń kórsetkishi 681 myń tonnany qurap, qańtar-naýryz aılarynyń josparyna 113 paıyzǵa jetti», - dedi mınıstr.

Sonymen qatar, esepti kezeńde bıtým óndirisi 111 myń tonnaǵa jetti, josparyna 92,2 paıyzǵa oryndaldy. Bekitilgen josparǵa qol jetkizý kelesi aılarda óteledi.

«Tutastaı alǵanda, munaıgaz-hımııa ónimderiniń kólemi 37 myń tonnaǵa jetti, bul aǵymdaǵy jyldyń qańtar-naýryz aılarynyń josparyna 46,6 paıyzdy quraıdy. Munaıgaz-hımııa óndirisi kórsetkishiniń tómen bolýynyń sebebi benzol jáne paraksılol ónimderin shyǵaratyn Atyraý munaı óńdeý zaýytynyń joǵaryda atalǵan sebeptermen toqtaýyna baılanysty boldy. Munaıgaz-hımııa ónimderin óndirýdiń negizgi kólemi atalmysh zaýytqa tıesili ekenin atap ótemin», - dedi N. Noǵaev.

Budan buryn habarlanǵandaı, atalǵan kórsetkishterdiń tómendeý sebepteri aǵymdaǵy jyldyń qańtar aıynda Atyraý munaı óńdeý zaýytynda elektr energııasyn jetkizýde paıda bolǵan irkiliske baılanysty.

Bul tehnologııalyq qondyrǵylardyń avarııalyq toqtaýyna ákeldi, sonyń saldarynan jóndeý jáne qalpyna keltirý jumystaryn júrgizý qajettiligi týyndady.