Energetıka mınıstri munaı qymbattasa, Qazaqstanǵa qandaı keri áseri bolatynyn aıtty

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide QR Energetıka mınıstri Bolat Aqsholaqov munaı qymbattaýynyń oń jáne teris jaqtaryn atady, dep habarlaıdy QazAqparat tilshisi.

«Iá, munaıdyń bir barreli 96 dollar bolatyny týraly jańalyq shyqty. Munaıdyń baǵasy joǵary bolsa, birinshi kezekte bıýdjet pen Ulttyq qorǵa túsetin kiris joǵary bolady. Vedomstvo bıyl 87,5 mln tonna deńgeıinde munaı óndirýdi josparlap otyr. Onyń 17,9 mln tonnasy ishki óńdeýge baǵyttalady», - dedi Bolat Aqsholaqov.

Mınıstr qalǵan munaıdyń bári eksportqa shyǵatynyn eskersek, bıýdjetke túsetin salyq kóbeıýi múmkin ekenin aıtady. Degenmen, ol bul tendentsııanyń keıbir jaǵymsyz jaqtary da bar ekenin eskertti.

«Munaı baǵasy óte joǵary bolsa, asa jaqsy emes. Óıtkeni barlyq biriktirilgen shyǵyn materıaldarynyń: qubyr ónimderiniń, hımııalyq reagentterdiń baǵasy ósedi. ıAǵnı, munaıdy alýǵa qajet jáne munaıda alynatyn túrli materaldar qymbattaıdy. Keıin munaı baǵasy túskenimen, álgi buıymdardyń baǵasy sol kúıi qalyp qoıady. Munaı óndirýshi kásiporyndar qazirdiń ózinde osydan zardap shegýde. Sondyqtan, meniń oıymsha, yńǵaıly dálizdiń shegi, 80 dollardan (bir barrel úshin. –red.) sál joǵary bolsa, árıne, jaqsy. Muny álemdegi naryq kórsetedi», - dep túıindedi Energetıka mınıstri.