Energetıka mınıstri munaı-gaz-hımııa baǵytyn damytý týraly aıtty

NUR-SULTAN. QazAqparat – 2025 jylǵa deıin munaı-gaz-hımııany damytý jónindegi ulttyq joba ázirlenedi. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Memleket basshysy iske asyrylyp jatqan munaı-gaz-hımııa óndiristerin jedeldetý jónindegi sharalardy qabyldaý, sondaı-aq áleýetti ınvestorlar úshin tartymdy jaǵdaılar jasaý mindetin qoıdy. Bul máselelerdi sheshý úshin birinshiden 2025 jylǵa deıin munaı-gaz-hımııany damytý jónindegi ulttyq joba ázirlenedi. Bul joba problemalyq máselelerdi sheshýge basa nazar aýdara otyryp, salany naqty damytýǵa múmkindik beredi. Atap aıtqanda: munaı-gaz-hımııa jobalaryn shıkizatpen qamtamasyz etý; munaı-gaz-hımııa klasterin qurý; odan ári qaıta bólýdi damytý», - dedi mınıstr.

Onyń aıtýynsha, ekinshiden, Úkimet pen ınvestor arasynda qol qoıylatyn jeke kelisimge munaı-gaz-hımııamen qatar kómirsýtegi shıkizaty jobalary da kiredi. Atalǵan másele qazirgi tańda pysyqtalýda jáne jaqyn arada usynystar joldanbaq.

«Úshinshiden, bul sharalar 2025 jylǵa qaraı 5 zaýyttyń qurylysyn aıaqtaýǵa múmkindik beredi. Bul rette mynadaı nátıjelerdi kútýge bolady: óndiris kólemi 9 esege artady; el ekonomıkasyna boljamdy áser qosymsha +1,2 paıyz. Osylaısha, bazalyq munaıgaz-hımııa ónimderin óndirý munaı-gaz salasyndaǵy tereń óńdeýdi damytý úshin berik negiz bola tura, shıkizat ekonomıkasyn ártaraptandyrý jáne tehnologııalyq damýǵa umtylý jónindegi strategııamyzǵa sáıkes keledi», - dedi Nurlan Noǵaev.