Energetıka mınıstri Qashaǵan úshin munaıdyń ońtaıly qunyn atady

ASTANA. QazAqparat - Munaı baǵasy barreline 50 dollar bolǵan kúnniń ózinde de Qashaǵan ken orny Qazaqstan úshin tıimdi bolmaq. Bul týraly Úkimet otyrysynan keıingi brıfıngte QR Energetıka mınıstri Qanat Bozymbaev málim etti, dep habarlaıdy QazAqparat.

«Biz árbir sandy tyńǵylyqty qadaǵalap otyrmyz. Sondyqtan bizge bul tıimsiz, durys emes dep tikesinen aıtý qajet. Óıtkeni, tipti barreli 50 dollar bolsa da Qashaǵan ken ornynan Qazaqstan tek salyq retinde kelisimshart merzimi aıaqtalǵanǵa deıin 20-25 mlrd. dollardan astam alady. Egerde barrel baǵasy máselen, 70 dollar bolsa, onda Qazaqstan tek salyq túrinde 46-47 mlrd. dollar ala alady. Egerde munaı birneshe jyl burynǵydaı barreline 100 dollar bolsa, onda bul 75-76 mlrd. dollardy quraıdy»,- dedi mınıstr.

Bozymbaev Qazaqstan álemdik munaı óndirý naryǵynda zor úles almaıtyndyǵyn basa aıtty. Máselen, álemde táýligine 34 mln. barrel munaı óndirilse, ondaǵy Qazaqstannyń úlesi ne-bári 1,5 mln. barreldi ǵana quraıdy. Al álemdik munaı óndirý alpaýyty retinde Saýd Arabııasyn, Reseıdi, Iran, Brazılııa men Meksıkany aıtýǵa bolady.

«Bizdiń (munaı óndirý kólemin) qysqartqanymyz nemese arttyrǵanymyz aıtarlyqtaı úlken ról oınamaıdy», - dedi Bozymbaev.

Qashaǵan - Kaspıı teńiziniń qazaqstandyq bóliginde ornalasqan álemdegi iri munaı jáne gaz ken orny. Ol Atyraý qalasynan ońtústik-batysqa qaraı 80 shaqyrym jerde ornalasqan. Qashaǵan 75x45 shaqyrym aýmaqty alyp jatyr. Qashaǵan sońǵy 40 jylda tabylǵan álemdegi eń iri ken orny sanalady. Ken ornynyń kollektory Kaspıı teńiziniń soltústik bóliginde teńiz túbinen 4200 metrdeı tereńdikte jatyr. Sońǵy zertteý derekterine sáıkes, ken orynnyń munaı qory 913 mıllıard barrel munaıdy quraıdy.

Qazirgi ýaqytta Qashaǵan ken ornynan táýligine 100 myń tonna barrel munaı óndirilýde. Jyl sońyna deıin atalǵan ken ornynan munaıdy eksportqa shyǵarý 500 myń tonnaǵa jetedi dep kútilýde.