Energetıka mınıstri Qarashyǵanaq jobasyna qatysty túsinik berdi
«Qarashyǵanaq jobasyna qatysty gaz boıynsha óndiristik shekteýlerdi alyp tastaý jáne gazdy jer qoınaýyna keri aıdaýdyń 4-shi kompressory jobasy sııaqty ınvestıtsııalyq jobalar iske asyrylyp jatyr.
Atalǵan jobalardy iske qosý Ónimdi bólý týraly kelisim (ÓBTK) merziminiń sońyna deıin qosymsha 18,5 mln tonna suıyq kómirsýtegin óndirýge múmkindik beredi, ınvestıtsııa somasy - 1 mlrd 678 mln AQSh dollary.
Atap ótetin mańyzdy másele – Qarashyǵanaq boıynsha kópjyldyq kelissózder aıaqtaldy. Sonyń nátıjesinde Halyqaralyq konsortsıým Respýblıkaǵa 1,3 mlrd AQSh dollaryn tólep, óndiriletin ónimdi bólý ádistemesine ózgerister engizdi, bul kelisimsharttyń qoldanylý merzimi aıaqtalǵanǵa deıin (2037j.) bıýdjetke shamamen 600 mln dollaryn qosymsha ákeledi», - dedi mınıstr.
Onyń aıtýynsha, 2020 jylǵy jeltoqsan aıynda Qarashyǵanaq ken ornyn keńeıtýdiń 1-kezeńi (QKJ-1) iri ınvestıtsııalyq jobasyn iske asyrý boıynsha Túpkilikti ınvestıtsııalyq sheshim qabyldandy. Bul gazdy jer qoınaýyna keri aıdaýdyń 5-shi kompressoryn iske qosýdy eskere otyryp, suıyq kómirsýtegin óndirýdi jylyna 10-11 mln tonna deńgeıinde ustaýǵa baǵyttalady. Jobanyń bıýdjeti 970 mln AQSh dollary. Aıaqtalý merzimi -2025 jyl.
