Energetıka mınıstri Qaraǵandy oblysynyń jylytý maýsymyna daıyndyǵyn tekserdi

QARAǴANDY. QazAqparat – Qaraǵandy oblysynda jylý berý maýsymyna daıyndyq boıynsha is-sharalardy oryndaý 93,3% qurady. Bul týraly QR Energetıka mınıstri Bolatov Aqsholaqovtyń Qaraǵandy oblysynyń turǵyndarymen kezdesýinde málim boldy, dep habarlaıdy QazAqparat tilshisi.

Búgingi tańda Qaraǵandy oblysynda negizgi energııa kózderi – Qaraǵandy JEO-3, «ArselorMıttal Temirtaý» AQ JEO-2, «Topar negizgi taratý energostantsııasy». Jumys sapary barysynda Energetıka mınıstri Bolat Aqsholaqov oblys basshylyǵymen birge osy nysandardy aralap kórdi.

Berilgen esepke sáıkes, bıylǵy jyldyń segiz aıynda Qaraǵandy oblysy boıynsha 7,3 mlrd kVts elektr energııasy óndirilgen. Jylýmen jabdyqtaýdyń negizgi kózderi bolyp tabylatyn JEO-3 jáne JEO-2 bıyl 1,8 myń Gkal/saǵ qýat óndirgen.

Qaraǵandy oblysynda aldaǵy jylytý maýsymyna daıyndyq naýqany shtattyq rejımde ótýde. Kúzgi-qysqy kezeńge barlyǵy 7 energııa kózi jáne 685 jergilikti jylý kózderi, 569 birlik shaǵyn elektr stantsııalary, 2116 km ınjenerlik jeliler, 1126 áleýmettik sala nysandary jáne 5 598 turǵyn úıdiń negizgi jáne qosalqy jabdyqtary daıyndalatyn bolady. Búgingi kúni jylý berý maýsymyna daıyndyq boıynsha is-sharalardy oryndaý ortasha eseppen 93,3% quraıdy.

Sonymen qatar óńirde jańartylatyn kózder tehnologııasyn qoldaný arqyly energııa óndirisi belsendi damýda. Qaraǵandy oblysynda jalpy qýaty 218,7 MVt JEK 7 obektisi bar, onyń ishinde qýaty 216 MVt 4 kún elektr stantsııasy jáne qýaty 2 MVt 2 bıoelektr stantsııasy, qýaty 0,6 MVt 1 sý elektr stantsııasy bar.