Energetıka mınıstri NCOC kompanııasy qyzmetkeriniń qazasy týraly pikir bildirdi

ASTANA. KAZINFORM — Energetıka mınıstri Erlan Aqkenjenov Májilistiń jalpy otyrysynan keıin NCOC kompanııasynyń bólim basshysy bolǵan Bıbigúl Shpanovanyń kisi qolynan qaıtys bolýyna baılanysty pikir bildirdi.

— Ókinishke qaraı, bul óte óreskel jaǵdaı. Marqumynyń otbasy men jaqyndaryna mınıstr retinde kóńil aıtamyn. Men ony tanymaıtynmyn. Búgingi tańda tergeý áreketteri júrip jatqanyn bilemin. Osy qylmysqa kináliler tabylatynyna, tıisti jolmen jazalanatynyna senimdimin. Qaıǵyly jaǵdaı onyń jumysymen baılanysty boldy ma, joq pa, ol týraly pikir bildire almaımyn. Tergeý jumystary bárin anyqtaıdy dep oılaımyn. Bálkim bul turmystyq zorlyq-zombylyq boldy ma, aıta almaımyn. Tergeý júrip jatyr, — dedi Erlan Aqkenjenov.

Eske sala keteıik, buǵan deıin Atyraýda áıeldiń ólimine baılanysty qylmystyq is qozǵalǵanyn jazǵan edik.

Artynsha Atyraýda 46 jastaǵy áıeldi óltirgen kúdikti qamaýǵa alynǵan bolatyn.