Energetıka mınıstri: Munaı óndirý kólemi 99,5 mln tonnaǵa jetti
ASTANA. KAZINFORM — Energetıka mınıstri Erlan Aqkenjenovtyń Munaı-gaz salasy qyzmetkerleriniń kúnimen quttyqtady.
— Qurmetti munaı-gaz salasynyń qyzmetkerleri men ardagerleri! Sizderdi kásibı merekemiz — Munaı-gaz kesheni qyzmetkerleri kúnimen shyn júrekten quttyqtaımyn! Árbir tonna munaı men árbir tekshe metr gazdyń artynda úlken eńbek, jaýapkershilik pen joǵary kásibılik tur. Kún saıyn sizder kásiporyndardyń turaqty jumysyn qamtamasyz etip, elimizdiń energetıkalyq qaýipsizdigin nyǵaıtyp kelesizder. Ótken jyl biz úshin rekordtyq kórsetkishtermen erekshelendi: munaı óndirý kólemi toqsan toǵyz bútin bes mıllıon tonnaǵa jetti, — dedi mınıstr.
Erlan Aqkenjenov byltyr elimizdiń munaı óńdeý zaýyttarynda on segiz bútin tórt mıllıon tonna munaı óńdelgenin aıtty.
— Aldymyzda jańa mindetter men eleýli belester tur. Sizderdiń tájirıbe, bilim men birlesken eńbekterińizdiń arqasynda bul mindetterdi abyroımen oryndaı alamyz. Biz munaı óndirýmen ǵana shektelmeı, salany keshendi túrde damytyp kelemiz. Byltyr elimizdiń munaı óńdeý zaýyttarynda on segiz bútin tórt mıllıon tonna munaı óńdeldi.
Munaı-gaz hımııasy men gaz salasyn da damytyp, jańa óndirister men jumys oryndary ashylýda. Tabıǵı gaz qoljetimdi bolýda. Búginde elimizdi gazdandyrý deńgeıi alpys tórt paıyzdan asty. On úsh mıllıonnan astam azamatymyz tabıǵı gazdyń ıgiligin kórip otyr, — dedi ol.
Ol ken oryndary men zaýyttarda eńbek etip, Qazaqstannyń damýyna úles qosyp júrgenderge alǵys aıtty.
— Bizdiń mindetimiz — gazben elimizdiń barlyq turǵyndaryn qamtamasyz etý. Osy jetistikterdiń barlyǵy sizderdiń arqalaryńyzda múmkin boldy. Árbir kórsetkishtiń artynda adamdardyń bilimi, tájirıbesi men eńbegi tur. Ardagerlerimizge erekshe alǵysymdy bildirgim keledi. Sizder munaı-gaz salasynyń negizin qaladyńyzdar. Bul mol tájirıbe biz úshin árdaıym úlken qundylyq bolyp qala bermek.
Dál qazir ken oryndary men zaýyttarda eńbek etip, Qazaqstannyń damýyna úles qosyp júrgen árqaısyńyzǵa alǵys aıtamyn. Sizderge jáne jaqyndaryńyzǵa zor densaýlyq, ár otbasyǵa amandyq, baq-bereke, molshylyq pen senim tileımin. Eńbekterińiz árdaıym qaýipsiz, jobalaryńyz tabysty bolsyn! Kásibı mereke qutty bolsyn, — dedi mınıstr.
