Bıyl jer qoınaýyn ıgerý kelisimsharttaryna revızııa jasalady
ASTANA. KAZINFORM – Energetıka mınıstri Erlan Aqkenjenov vedomstvonyń alqa májilisinde josyqsyz ınvestorlarmen kúres jalǵasatynyn málim etti.
- 2026 jyly keminde 2 elektrondyq aýktsıon ótkizý jáne mindettemelerin oryndamaǵan kelisimsharttarǵa revızııa júrgizý josparlanyp otyr, - dedi ol.
Erlan Aqkenjenov 2025 jyly jer qoınaýyn paıdalanýshylar satyp alǵan taýarlar men qyzmetterdiń 65 paıyzyn qazaqstandyq kompanııalar jetkizgenin aıtty. Ony aqshaǵa shaqsaq, 3 trln teńge degen sóz.
Buǵan deıin Premer-mınıstr Oljas Bektenov jer qoınaýyn paıdalanýshylarǵa aıyppuldy dollarmen esepteý múmkin emes ekenin aıtqan bolatyn.
– Qazaqstan aýmaǵyndaǵy ekologııalyq quqyq buzýshylyqtar máseleleri tek ulttyq zańnama aıasynda ǵana qaralady. Ekologııalyq talaptardy buzǵany úshin ákimshilik aıyppuldar Ekologııalyq kodekske jáne Ákimshilik quqyq buzýshylyq týraly kodekske sáıkes ulttyq valıýtada salynady. Osyǵan baılanysty atalǵan aıyppuldardy shetel valıýtasyna teńestirý, sondaı-aq osydan týyndaıtyn valıýtalyq mándegi «shyǵyndar» týraly tujyrymdar mundaı óndirip alýlardyń quqyqtyq tabıǵatyna sáıkes kelmeıdi jáne quqyq qoldaný tájirıbesinde qoldanylmaıdy, - dedi Úkimet basshysy jaýabynda.
