Mınıstr «Qashaǵanda» munaıdyń tógilý yqtımaldyǵyna qatysty pikir bildirdi

ASTANA. KAZINFORM – Kaspıı teńiziniń qazaqstandyq sektoryndaǵy «Qashaǵan» ken ornynda munaı tógilgeni týraly derek áli rastalǵan joq. Bul týraly Energetıka mınıstri Almasadam Sátqalıev aıtty.

«Qashaǵandaǵy teńiz keshenin paıdalaný kezinde osyǵan deıin munaı tógilmedi. Sondyqtan qazir taralǵan aqparat tekserilip jatyr, ıaǵnı ǵaryshtyq monıtorıngten kelgen sýretke taldaý jasalýda. Sýrettegi beıne tabıǵı qubylys retinde kórinip tur. Qazir sol aýmaqta sý synamalary alynyp jatyr. Ázirge, munaıdyń tógilgeni rastalmady. Ol jerde de ekologtardyń jumysy jalǵasady. Jalpy, tıisti komıssııanyń jumysy jalǵasyp jatyr», - dedi mınıstr Parlament Májilisinde tilshiler suraǵyna jaýap bere otyryp.

Onyń sózine qaraǵanda, qajet bolǵan jaǵdaıda mamandar sol aýmaqty tikushaq arqyly zertteıdi.

«Qazir sý kóligimen tekserý júrip jatyr. Sebebi sýdan synama alý úshin qaıyqpen júrgen yńǵaıly», - dedi vedomstvo basshysy.

Aıta keteıik, jaqynda Kaspıı teńiziniń qazaqstandyq sektoryndaǵy «Qashaǵan» ken ornynyń aýmaǵynda munaıǵa uqsas daq baıqalǵan. 

Atyraýdaǵy «Globýs» ekologııalyq-quqyqtyq bastamalar ortalyǵynyń tóraıymy Galına Chernovanyń aqparatyna qaraǵanda, Kaspıı teńizinde munaıdyń tógilgeni anyqtalǵan. Ol bul derekti eýropalyq Sentinel-1A spýtnıginiń 30 naýryzdaǵy radarlyq sýretine súıenip, áleýmettik jelidegi paraqshasyna júktedi.

«Qashaǵanda» munaı tógilgeni rastalsa, jospardan tys tekserý júrgiziledi. 

Kaspııdegi «Qashaǵan» ken ornynda munaıdyń tógilgeni anyqtalmaǵanyn jazǵan bolatynbyz.