Energetıka mınıstri: Qarashyǵanaq gaz óńdeý zaýytyn salýǵa keminde 2,5 mlrd dollar kerek
ASTANA. KAZINFORM — Energetıka mınıstri Erlan Aqkenjenov Májilis kýlýarynda Qarashyǵanaq gaz óńdeý zaýytyn salý nege sonsha qymbatqa baǵalanyp otyrǵan túsindirdi.
— Qazir biz Qarashyǵanaq gaz óńdeý zaýytyn salý máselesin talqylap jatyrmyz. Bul jerde ilespe gazdy óńdeý sóz bolyp otyr. Qurylys quny 2,5 mlrd dollardan bastalady. Nege? Óıtkeni ol gazdyń quramynda kúkirt pen ózge de qospalar óte kóp. Ony óńdemeı turyp, óndiriske daıyndaý kerek. Bul ózi óte «maıly» gaz. S1, S2, S3, S4 fraktsııalaryna úlken óndiris kesheni kerek. Al ol kóp aqshany qajet etedi. Sondyqtan jerden tegin shyǵyp jatqan gazdy óńdeı almaı otyrmyz deıtin ýájder qate paıym dep aıta alam, — dedi Erlan Aqkenjenov.
Eske salsaq, bıyl jazda Qarashyǵanaq aktsıonerleri gaz óńdeý zaýytyn salýǵa Qazaqstannan qosymsha $1 mlrd talap etkeni málim bolǵan.
Keıin Energetıka mınıstrligi bul joba ken ornynyń aktsıonerleri men memleket arasyndaǵy Ónim bólisý kelisimi aıasynda iske asyrylmaıtynyn málimdedi.
Vedomstvodaǵylar jobanyń ınvestıtsııalyq keleshegine qatysty túpkilikti sheshim 2025 jyldyń qazan-qarashasynda qabyldanatynyn aıtqan.
Al ótken demalys kúnderi «Gazpromnyń» Orynbor gaz óńdeý zaýytyna Ýkraına drondary shabýyldap, saldarynan zaýyt Qarashyǵanaq ken ornynan shıki gaz qabyldaýdy ýaqytsha toqtatqan.
Resmı málimet boıynsha, Orynbor zaýyty búgin Qazaqstan gazyn qaıta qabyldaı bastaǵan.