Energetıka mınıstri: bıyl tórtinshi munaı óńdeý zaýyty boıynsha naqty sheshim bolady
ASTANA. KAZINFORM – Qazir tórtinshi munaı óńdeý zaýyty salynatyn óńirler zerttelip jatyr. Bul týraly Energetıka mınıstri Erlan Aqkenjenov aıtty.
Búgin Úkimet otyrysynan keıingi baspasóz máslıhatynda Qazaqstanda tórtinshi munaı óńdeý zaýytyn salý josparyna qatysty suraq qoıyldy.
- Osy suraqqa naqty jaýap beremin. Atap aıtqanda, tórtinshi zaýyt iske asyrylady. Qazirgi tańda tehnıkalyq-ekonomıkalyq negizdemeler pysyqtalyp jatyr. Ásirese, «Samuryq-Qazyna» qory osy baǵytta jumysyn júrgizip jatyr. Osy jyldyń aıaǵyna deıin naqty sheshim qabyldanady, - dedi E.Aqkenjenov.
Onyń aıtýynsha, qazir zaýyt salynatyn oryndy tańdaýǵa qatysty talqylaý júrip jatyr. Bul turǵyda Mańǵystaý, Atyraý, Ulytaý oblystaryndaǵy, sondaı-aq eldiń ońtústik óńirindegi alańdar zerttelip jatyr.
- Bul baǵytta elektr energııasy men sýmen qamtamasyz etý kózderi, sondaı-aq basqa qajettilikterdiń bári nazarǵa alynady. Negizi, osy jobany iske asyrý úshin 3 nemese 4 jyl kerek. Tehnıkalyq-ekonomıkalyq negizdeme jáne jobalyq qujattamalardy, qurylys jumystaryn júrgizýdi eskere otyryp, 4 jyldyń shamasynda iske asyrylady, - dedi mınıstr.
Buǵan deıin tórtinshi munaı óńdeý zaýytyn salýǵa 10 mlrd dollar jumsalýy múmkin ekeni aıtylǵan edi.
