Energetıka mınıstri Almatydaǵy JEO-3 jańǵyrtý qarqynyn synǵa aldy

ASTANA. KAZINFORM — Energetıka mınıstri Erlan Aqkenjenov jumys sapary barysynda Almaty energetıkalyq toraptaryn gazǵa kóshirý jónindegi strategııalyq jobalardyń júzege asyrylý barysyn tekserdi, dep habarlaıdy vedomstvonyń baspasóz qyzmeti.

Mınıstrlik basshysy JEO-2 jáne JEO-3 qurylys alańdaryn aralap shyqty. Nysandardy aralaý barysynda Erlan Aqkenjenov megapolıs úshin jylý elektr stansalaryn gazǵa kóshirýdiń áleýmettik mańyzyn atap ótti.

— Almaty qalasynda ekologııalyq jaǵdaı kúrdeli. Jylý elektr stansalaryn gazǵa kóshirý — Memleket basshysynyń tapsyrmasy jáne halyq aldyndaǵy mindetimiz. Bul máselede qatelesýge jol joq, — dedi Energetıka mınıstri merdigerlerge arnaǵan sózinde. 

JEO-2 nysanyn aralaý barysynda oń dınamıka baıqaldy. Merdiger uıymnyń ókilderi 2 jáne 3 nómirli ystyq sý qazandyqtarynyń gıdravlıkalyq synaqtardan sátti ótkenin habarlap, jumys kestege sáıkes júrgizilip jatqanyn jetkizdi. Alaıda JEO-3 qurylys alańyndaǵy jaǵdaıdy vedomstvo basshysy qatań synǵa aldy.

Mınıstr jobanyń bekitilgen kesteden kesh júrgizilip jatqandyǵyn alǵa tartyp, bas merdiger uıymnyń jumysty júıeli uıymdastyra almaǵanyn atap ótti.

Qurylys kompanııalarynyń basshylary men ókilderine Erlan Aqkenjenov resýrstardy shuǵyl jumyldyrýdy talap etip, merdigerlerdiń jeke jaýapkershiligin naqtylady.

Atalǵan jobanyń júzege asyrylýy Energetıka mınıstrliginiń turaqty baqylaýyna alynyp, jaýapty tulǵalarǵa aptalyq esep berý mindetteldi.

Budan buryn Oljas Bektenov energııa tapshylyǵy máselesin sheshý úshin jańa qýattardy generatsııalaý máseleleri boıynsha jıyn ótkizgenin jazǵanbyz. Jıyn barysynda Premer energetıka jobalaryn keıinge qaldyrý tájirıbesin synǵa aldy.