Energetıka men kommýnaldyq sektorlardy jańǵyrtý jobasy Prezıdenttiń baqylaýynda – Bektenov
ASTANA. KAZINFORM – «Energetıkalyq jáne kommýnaldyq sektorlardy jańǵyrtý» ulttyq jobasyn iske asyrý máselesi Memleket basshysynyń tikeleı baqylaýynda. Bul týraly Premer-mınıstr Oljas Bektenov Úkimet otyrysynda málimdedi.
Úkimet basshysynyń aıtýynsha, ulttyq jobany júzege asyrýǵa qajetti normatıvtik-quqyqtyq baza tolyq qabyldandy. Investıtsııalyq jobalardy qarjylandyrý tetikteri aıqyndalǵan. Óńirlerde aýqymdy jóndeý jumystary bastalyp ketti.
– Belgilengen nysanaly kórsetkishterge ýaqytyly qol jetkizý úshin ınfraqurylymdy jańǵyrtý qarqynyn saqtap qana qoımaı, ony odan ári arttyrý qajet. Ulttyq ekonomıka mınıstrligi múddeli memlekettik organdarmen birlesip, Ulttyq jobany iske asyrýǵa baǵyttalǵan ınvestıtsııalyq qarajattyń tıimdi ıgerilýin qamtamasyz etýge tıis, – dedi Oljas Bektenov.
Sondaı-aq Premer-mınıstr óńirlerdegi kelisimsharttardy ýaqytyly bekitý men qarjylandyrý máselesine nazar aýdardy. O. Bektenov oblys ákimdikterine eki aptada bıyl júzege asyrylatyn jobalar boıynsha qajetti sharalardy qabyldaýdy tapsyrdy.
Úkimet basshysy Ónerkásip jáne qurylys, Energetıka jáne Ulttyq ekonomıka mınıstrlikterimen birlesip, jyl sońyna deıin barlyq josparlanǵan jóndeý jumystarynyń aıaqtalýyn qamtamasyz etýdi mindettedi.
Onyń sózinshe, bul baǵyttaǵy jumystar úshin oblys ákimderi tikeleı jaýapty bolady.
– Ulttyq jobany iske asyrý barysyndaǵy basym baǵyttardyń biri – otandyq taýar óndirýshilerdi qoldaý. Ónerkásip jáne qurylys mınıstrligi eki aptada Taýar óndirýshiler tizilimin Ulttyq joba aıasynda suranysqa ıe Sáýlet-qala qurylysy jáne qurylys katalogynyń kodtarymen tolyqtyrýy qajet. 1 qyrkúıekke deıin jańa óndirister qurý jáne qoldanystaǵy kásiporyndardy keńeıtý boıynsha áleýetti ofteık-kelisim-sharttardy bekitý jumystaryn jedeldetýge tıis. Bul másele Úkimette birneshe ret talqylanǵan bolatyn, biraq áli kúnge deıin tolyq sheshilgen joq, – dedi Premer-mınıstr.
Aıta keteıik, Memleket basshysynyń tapsyrmasymen Úkimet «Energetıkalyq jáne kommýnaldyq sektorlardy jańǵyrtý» ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
Qazaqstannyń kommýnaldyq sektoryn jańǵyrtýǵa 6 halyqaralyq qarjy ınstıtýty kómektesedi.
Bıyl elimizde 1,1 trln teńgeden astam qarjyǵa 12 myń shaqyrym ınjenerlik jeli jóndeledi.
