Energetıka men kommýnaldyq sektordy jańǵyrtý isinde otandyq ónimge basymdyq beriledi - Naǵaspaev
ASTANA. KAZINFORM – Elimizdegi tozǵan sý qubyrlary, káriz júıesi t.b. ınfraqurylymdy jańǵyrtýda Qazaqstanda jasalǵan materıaldar paıdalanylady. Bul jóninde Úkimet otyrysynda QR Ónerkásip jáne qurylys mınıstri Ersaıyn Naǵaspaev málimdedi.
Onyń sózinshe, ulttyq jobany iske asyrý qurylys materıaldaryna, jabdyqtar men qosalqy bólshekterge aıtarlyqtaı ishki suranys qalyptastyryp, otandyq ónerkásipti damytýǵa qosymsha serpin beredi.
Ulttyq jobanyń negizgi mindetteriniń biri – otandyq ónimdi damytý.
Búginde otandyq óndirýshiler Ulttyq jobanyń qajettiligin keń aýqymda qamtamasyz etýge daıyn.
– Aldaǵy eki jylda ulttyq joba aıasynda qurylys materıaldary men jabdyqtarǵa boljamdy qajettilik 900 mıllıard teńgeden asady. Onyń ishinde elektrmen jabdyqtaýǵa qajettilik 342 mıllıard, jylýmen jabdyqtaýǵa 232 mıllıard, sýmen jabdyqtaýǵa shamamen 200 mıllıard jáne sý burý jobalaryna 177 mıllıar teńgeden astam qarjy kerek. Qazaqstandyq taýar óndirýshilerdiń óndiris qýaty osy qajettiliktiń basym bóligin, ásirese kabel-ótkizgish jáne qubyr ónimder, temirbeton buıymdary men qubyr armatýrasyn qamtamasyz etýge qabiletti, – dedi mınıstr.
Aıta keteıik, buǵan deıin Elimizde 1,9 myń shaqyrym sý qubyry jańartylatynyn jazǵanbyz.
