Energetıka kásiporyndarynyń qyzmetkerlerine jeńildetilgen ıpoteka beriledi
ASTANA. KAZINFORM – «Otbasy bank» AQ-nyń «Korporatıvtik» baǵdarlamasy negizinde jeńildetilgen nesıeleý tetikterin paıdalana otyryp, korporatıvtik turǵyn úı baǵdarlamalaryn engizý josparlanyp otyr
«Kómir generatsııasyn damytý» ulttyq jobasy aıasynda energetıka salasynyń kadrlyq turaqtylyǵyn qamtamasyz etýge erekshe nazar aýdarylady.
Jańa elektr stantsııalaryn salý jáne qoldanystaǵy generatsııalaýshy qýattardy jańǵyrtý jobalaryn iske asyrý energetıka salasynyń kadrlyq áleýetin júıeli túrde nyǵaıtýdy talap etedi. Qazirgi ýaqytta generatsııa sektorynda birqatar qurylymdyq másele baıqalady, onyń ishinde qyzmetkerlerdiń ortasha jasynyń joǵary bolýy, bilikti mamandar tapshylyǵy jáne zamanaýı tsıfrlyq tehnologııalar men avtomattandyrý salasynda quzyretteri bar jas mamandardyń jetkiliksiz kelýi bar.
Osyǵan baılanysty kadrlyq resýrstardy damytýǵa baǵyttalǵan keshendi sharalar qarastyrylǵan. Negizgi baǵyttardyń biri — kadrlardy daıarlaý jáne olardyń biliktiligin arttyrý júıesin jetildirý. Energetıka kásiporyndarynyń qyzmetkerlerin qaıta daıarlaý jáne oqytý baǵdarlamalaryn keńeıtý josparlanýda, onyń ishinde zamanaýı basqarý júıelerimen jumys isteý, tsıfrlyq tehnologııalar, ónerkásiptik qaýipsizdik jáne ekologııalyq standarttar boıynsha bilim berý kózdelgen.
Sonymen qatar energetıka salasynyń tartymdylyǵyn arttyrý boıynsha jumys kúsheıtiledi. Atap aıtqanda, eńbek jaǵdaılaryn jaqsartý jáne qyzmetkerlerdiń áleýmettik paketin damytý boıynsha sharalar qarastyrylǵan.
Qyzmetkerlerdi turǵyn úımen qamtamasyz etý máselesine erekshe kóńil bólinedi. Energetıka kásiporyndarynyń qyzmetkerlerin baspanamen qamtý úshin jumys berýshilerdiń qatysýyn kózdeıtin «Otbasy bank» AQ-nyń «Korporatıvtik» baǵdarlamasy negizinde jeńildetilgen nesıeleý tetikterin paıdalana otyryp, korporatıvtik turǵyn úı baǵdarlamalaryn engizý josparlanyp otyr.
Atalǵan sharalardy iske asyrý jas mamandardy tartýǵa, kadrlardyń biliktilik deńgeıin arttyrýǵa jáne jańa ári jańǵyrtylǵan energetıkalyq qýattardy tıimdi paıdalanýǵa qajetti turaqty kadrlyq bazany qalyptastyrýǵa múmkindik beredi.
Aıta ketelik Qazaqstanda ıpoteka boıynsha eki shekti mólsherleme engiziledi.
