Energetık eńbegine kórsetilgen joǵary qurmet
ASTANA. KAZINFORM — Energetıka salasy — el ekonomıkasynyń turaqty damýy men ulttyq qaýipsizdiginiń negizgi tirekteriniń biri. Ónerkásiptiń, ınfraqurylymnyń, áleýmettik salanyń úzdiksiz jumys isteýi elektr energııasynyń senimdi ári turaqty berilýine tikeleı baılanysty, dep habarlaıdy KEGOC kompanııasynyń baspasóz qyzmeti.
Sondyqtan bul salada eńbek etetin árbir mamannyń jaýapkershiligi erekshe, al olardyń mańdaı terimen atqarǵan eńbegi memleket úshin asa qundy. Osy turǵyda KEGOC kompanııasy adam kapıtalyn basty qundylyq dep sanaıdy. Kompanııada óz isine adal, tájirıbesi mol, kásibı bilikti mamandar eńbek etedi. Solardyń biri — «Sarybaı aımaqtyq elektr toraby» fılıalyna qarasty 220 kV «Tobyl» qosalqy stantsııasynda qyzmet atqaratyn elektr dánekerleýshi Fazylbek Qaıleuly Bekmaǵanbetov.
Fazylbek Qaıleulynyń eńbek joly qarapaıym traktorshy mamandyǵynan bastaldy. Keıin elektromonter retinde kásibı jolyn jalǵastyryp, jyldar boıy tájirıbe jınaqtady. 1997 jyldan bastap KEGOC júıesinde qyzmet etip keledi. Búginde ol joǵary kerneýli jabdyqtardy jóndeý isiniń sheberi, óz isin tereń meńgergen, áriptesteri arasynda zor qurmetke ıe maman.
Fazylbek Bekmaǵanbetov joǵary kerneýli ajyratqyshtar men kommýtatsııalyq jabdyqtardy jóndeý, baptaý jáne tekserý jumystaryn joǵary deńgeıde atqarady. Sonymen qatar, ol jas mamandarǵa tálimgerlik jasap, óziniń baı tájirıbesimen bólisip keledi. Ujymdaǵy turaqtylyq pen óndiristik úderisterdiń úzdiksiz júrýine qosqan úlesi zor.
Dál osyndaı eńbek adamdarynyń arqasynda elimizdiń elektr energetıkasy berik negizde damyp keledi. Energetıka — tek tehnıka ǵana emes, bul — jaýapkershilik, tártip jáne adam eńbeginiń nátıjesi.
Jaqynda Qazaqstan Respýblıkasy Táýelsizdigi kúni men kásibı mereke — Energetıkter kúni qarsańynda Fazylbek Qaıleulynyń kóp jylǵy adal eńbegi memleket tarapynan joǵary baǵalandy. Ol «Eren eńbegi úshin» medalimen marapattaldy. Memlekettik nagradany Qazaqstan Respýblıkasynyń Prezıdenti Qasym-Jomart Toqaev tabystady.
— Bul marapat — men úshin úlken mártebe. Sonymen qatar, bul — úlken jaýapkershilik. Eńbegińniń elenýi aldaǵy ýaqytta da aıanbaı eńbek etýge, salanyń damýyna úles qosa berýge jigerlendiredi, — deıdi marapat ıesi.
Fazylbek Bekmaǵanbetov syndy eńbek adamdary — el energetıkasynyń senimdi tiregi. Osyndaı kásibı mamandar barda Qazaqstannyń energetıkalyq júıesi turaqty, ekonomıkasy myǵym bolary sózsiz.