Enem de at qulaǵynda oınaıtyn shabandoz bolǵan, sondyqtan qoldap otyrady — bloger Asyl Ahmetova
PETROPAVL. KAZINFORM — Aýyldaǵy ómirdi búkpesiz jarııalap, áleýmettik jelide jylqyshy qyz retinde tanylǵan Asyl Ahmetova qazir Soltústik Qazaqstan oblysy Lobanovo eldi mekeninde ustaz bolyp eńbek etedi. Ómirge qushtar boıjetken bıyl turmys qurdy. Endi joldasymen birge aýyl balalaryna ulttyq oıyndardy — sadaq atýdy, sonyń ishinde jamby atýdy úıretip jatyr. Áleýmettik jelide de belsendi, ulttyq bolmysymyzdy nasıhattap keledi.
— Asyl, áleýmettik jelige qalaı keldińiz? Alǵashqy tanymaldylyq qaı kezde, qaı jazbańyzdan keıin keldi?
— Qatelespesem 2020 jyl bolatyn, TikTok jelisi qarqyndy damyp kele jatty. Birde úıdiń sharýasyn istep júrip, vıdeo túsirip, áleýmettik jelige sala bastadym. Jazbalaryma jurttyń qyzyǵýshylyǵyn baıqadym. Keıin minip júrgen jylqymmen bir vıdeo túsirdim. Sol beınejazba kóbine unady. Shóp, sý tasyp júrgen beınejazbalarym boldy, aýyl ómirin shynaıy kórsetýge tyrystym, solardy kórip oqyrmandarym jaza bastady.
— Jylqyshynyń qyzy bolǵandyqtan attyń qulaǵynda oınaısyz ba, álde basqa sebebi bar ma? Jalpy neshe jasyńyzda atqa otyrdyńyz?
— Negizi bes jasymda atqa otyrdym. Ákem janynan qaldyrmaı ózimen birge ertip júrdi. Sol kezden qyzyǵýshylyǵym, jylqy malyna degen súıispenshiligim oıandy. Mektepte oqyp júrgende keıde ákemniń ornyna mal baǵýǵa baratynmyn.
— Blogerlikten basqa taǵy qandaı hobbıińiz bar? Sadaq atasyz, án aıtasyz, mototsıkl júrgizesiz — biz bilmeıtin taǵy qandaı qyrlaryńyz bar?
— Oqyrmandarymnan qupııam joq, olar barlyq qyrymdy biledi. Óıtkeni bar biletinimmen bóliskim keledi áleýmettik jelide, sondyqtan basqa jasyryp júrgen talantym joq. Sahnada án aıtý bala kezden armanym edi, qazir hobbıge aınaldy. Aýdanda bir is-sharalar bolǵan jaǵdaıda shaqyrady, sol kezde án aıtamyn.
— Blogerlik negizgi qyzmetińizge kedergi keltirmeı me? Birde Astanada, endi birde Almatyda júresiz. Oqýshylaryńyz jalpy sizdiń tanymaldyǵyńyzdy qalaı qabyldaıdy?
— Ulttyq ónerdi, ulttyq sportty nasıhattap, balalardyń qyzyǵýshylyǵyn oıatýymyz kerek. Bul bizdiń bir mıssııamyz dep bilemin. Balalar estigennen góri, kórgenin tez jadynda saqtaıdy. Úlgi bolyp, qyzyǵýshylyq týdyrý — maqsatym.
Túrli forýmdarǵa, respýblıkalyq is-sharalarǵa shaqyrtý alǵan kezde jumystan suranýǵa týra keledi. Keıin balalarmen sabaqty qýyp jetýimiz kerek. Biraq kedergiden góri meniń tanymaldylyǵymnyń oń áseri bar dep oılaımyn. Áriptesterim bolsyn, oqýshylar bolsyn únemi qoldap turady.
— Qazir 68 myń oqyrmanyńyz bar eken. Sizdi negizinen kim oqıdy?
— Kóbine ózimizdiń Soltústik óńirdiń turǵyndary oqıdy. Sosyn Almaty men Astanadan oqyrmandarym basym. Jasyna keler bolsaq — 18 ben 25 jas aralyǵynda.
Shetelden jazady, «Qazaqstanǵa kelip, kórgimiz keledi» dep. Aldynda Danııadan kelgen qyzdy kútip aldyq. Kóshpendiler oıyndary bizdiń aýyldan Uly dala joryǵymen bastalǵannan keıin sheteldikter kóp keldi, olarmen tanystyq, saltymyz ben mádenıetimizdi kórsettik.
— Osy Kóshpendiler oıynyn bizdiń elde ótkizýdi kezinde siz usynǵan ekensiz. Dúbirli doda kóńilińizden shyqty ma?
— Osydan eki jyl buryn Zerendide ótken forýmda Kóshpendiler oıynyn bizde ótkizý týraly ıdeıany aıtqan edim, sol kezde joǵary deńgeıde ótkize alamyz ba degen oı boldy. 2024 jylǵa deıin úlgeremiz be, qaı qalada ótedi degen suraqtar mazalady. Astana men Túrkistan qalalarynyń arasynda tańdaý turdy. Maǵan bári unady. Ashylýynda da boldym, barlyǵy qazaq tilinde ótti. Alǵash ret uıymdastyrylǵandyqtan múmkin kemshilikter bolǵan shyǵar, biraq ózim baıqamadym. Eń bastysy — Qazaqstanymyzdy kóptegen elder kórdi, qonaqtardyń bárine unady.
@assylym21 Ózime osy án unaıdy🥰 #rek ♬ orıgınalnyı zvýk — Kereı qyz🐎
— Turmys qurǵanyńyzdy bilemiz. Otbasylyq ómirge baılanysty burynǵy ómir súrý saltyńyzdy ózgertý oıyńyzda joq pa?
— Joldasym meni osy iste qoldaıdy. Ol da jylqy malyn jaqsy kóredi, kókpar oınaıdy. Qazir ekeýmiz birge sadaq atý úıirmesin ashyp jatyrmyz. Memleketten da, jergilikti atqarýshy bılikten de, mektebimnen de qoldaý bar. Jamby atýdy, aýdaryspaq oıynyn úıretemiz, balalar bos júrmesin degen maqsat. Enem de at qulaǵynda oınaıdy, kezinde qyz qýý oıyndaryna qatysqan. Sondyqtan meni ol da únemi qoldaıdy. Keıbir is-sharalarǵa barmaımyn desem, kerisinshe qatysqanymdy tilep, aıtyp otyrady.
— Bir beınejazbada shaýyp kele jatqan attyń ústinde tik turǵanyńyzdy kórdim, mundaı qaýipti jattyǵýlardy jasaýǵa qoryqpaısyz ba?
— Atqa ár mingen saıyn qorqamyn. Ne degenmen janýar ǵoı, úrkýi múmkin, sondyqtan saq otyrý qajet. Tazym bar, laıka tuqymdas «Moınaq» atty ıtim bar. Jalpy jan-janýardy jaqsy kóremin.
— Bir suhbatta óz sharýashylyǵymdy qurǵym keledi degen ekensiz, jalpy qandaı armanyńyz bar?
— Qazir kópshilik ózi unatqan kásibin ashyp jatyr. Men de óz sharýashylyǵymnyń bolǵanyn qalaımyn. Ulttyq sport, sonyń ishinde jylqymen baılanysty sportqa ketkim keledi. Jylqy malyn kóbeıtip, shákirt tárbıeleý oıymda bar. Qazir oqýshylarǵa arnap úsh jylqy ustap otyrmyz. Qazir men mektepten bólik kolledjde de eńbek etemin. Osy kolledjde basqa aýdannan, óńirlerden kelgen balalar oqıdy. Qazaqstannyń batysynan kóp. Oqýshylardyń da, stýdentterdiń de qazaqy ónerge qyzyǵýshylyǵy joǵary. Úırenem, atqa otyramyn degen balanyń betin qaqpaı, bárin úıirmege alyp jatyrmyz. Buıyrtsa jarystarǵa shyǵý da josparymyzda bar.
