Endigi maqsat Qazaqstannyń ǵaryshtyq memleketter qataryna qosylýy úshin jaǵdaı jasaý - T. Musabaev
áýirdiń 9-y. QazAqparat /Qanat Mámetqazyuly/ - Endigi maqsat Qazaqstannyń ǵaryshtyq memleketter qataryna qosylýy úshin jaǵdaı jasaý.
Búgin QR Parlamenti Senatynyń jalpy otyrysynda «Qazaqstan Respýblıkasy men RF arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda QR Ulttyq ǵarysh agenttiginiń tóraǵasy Talǵat Musabaev osylaı málim etti, dep habarlaıdy QazAqparat.
«Atalǵan kelisim Qazaqstan úshin ǵarysh qyzmetimen aınalysýǵa tolyq múmkindik beredi. Buǵan deıin bizdiń elimiz bul salaǵa eshqandaı tikeleı aralasa almaıtyn, tek Reseımen hat alysyp, keshen mańyndaǵy usaq-túıek máselelerden asa alǵan joq edik. Sondyqtan da endigi maqsat Qazaqstannyń ǵaryshtyq memleketter qataryna qosylýyna jaǵdaı jasaý. Qazaqtyń jerinde álemdegi teńdessiz «Baıqońyr» kesheni bar. Sondyqtan da biz óz jerimizdegi ǵarysh aılaǵynyń tolyqqandy ıesi bolýǵa tıispiz. Al búgingi kelisim qazaqstandyq mamandardyń óz betimen ǵarysh qyzmetimen aınalysýyna tolyq múmkindik beredi», dedi T. Musabaev.
Agenttik tóraǵasynyń aıtýynsha, elimizde ulttyq ǵarysh agenttigi qurylǵannan bastap qana, osy salada ózindik ınfraqurylym qalyptasqan. Qazirgi kúni ulttyq kadrler jınaqtalyp, az bolsa da bilikti mamandar «bir týdyń astyna» shoǵyrlandy. «Endigi kúni dál búgingi kezeńde osy kelisimdi qabyldaýǵa tıispiz. Sonda ǵana Qazaqstan bolashaqtaǵy ózindik ǵarysh salasyn qalyptastyra alady», dedi T. Musabaev.
Sondaı-aq, depýtattar saýalyna jaýap berýi barysynda Agenttik tóraǵasy Qazaqstannyń Halyqaralyq ǵarysh odaǵyna enbeýi saldarynan bizdiń ushqyshtardy ǵaryshqa ushyrý máselesi kúrdelenip ketkenin aıtqan bolatyn.
