Endi zıratta bos orynnyń bar-joǵyn ákimdiktiń saıtynan bilýge bolady
ASTANA. QazAqparat – Jerleý jáne zırattardy kútip ustaýdyń jańa erejeleri bekitilmek, dep habarlaıdy QazAqparat tilshisi.
«Jergilikti atqarýshy organdar zırat qorymy ornalasqan jáne olarǵa arnalǵan ortaq paıdalanýdaǵy jerden árbir qaıtys bolǵan azamatty nemese turǵylyqty jeri belgisiz adamdy jerleý úshin keminde 6 m2 bolatyn, biraq 8,1 m2 aspaıtyn jer ýchaskesin tegin bóledi. Zırat qorymynyń aýmaǵy zırattar qataryna bólinetin jáne avtomobıl kóligine arnalǵan ótpe joldarmen jáne zırat ýchaskelerine ótetin joldarmen jaılastyrylatyn ýchaskelerden turady», - dep jazylǵan Ashyq NQA portalynda jarııalanǵan Ulttyq ekonomıka mınıstriniń buıryq jobasynda.
Sonymen qosa jańa talapqa saı, endi Astana, Almaty, Shymkent qalalary men 17 oblystyń ákimdigi myna qyzmetterdi kórsetýge mindetteledi:
- zırattarǵa arnalǵan jer ýchaskelerin esepke alý jáne tirkeý derekterin (málimetterin) jınaqtaıdy;
- jerleýge, zırat qorymdaryn kútip ustaýǵa jáne olarǵa qyzmet kórsetýge shart talaptarynyń saqtalýyn baqylaıdy;
- zırat qorymynyń bos emes jáne bos ýchaskeleri boıynsha ózekti aqparatty jergilikti atqarýshy organnyń resmı ınternet-resýrsynda ornalastyrady.
Buıryq jobasy 21 qyrkúıekke deıin kópshilik talqysynda bolady.
