Endi jańa kólikter tehnıkalyq baıqaýdan ótpeıdi
ASTANA. QazAqparat - 20 qazanda «Jol júrisi týraly» QR Zańy kúshine endi. Zań kommertsııalyq emes avtokólikter úshin mindetti tehnıkalyq qarap tekserýden ótkizýdiń jańa tártibin qarastyrǵan. Endi shyǵarylǵan jylyn qosa alǵanda, 4 jyl bolǵan jeńil avtomobılder men olardyń tirkemeleri mindetti tehnıkalyq baıqaýdan ótpeıdi.
«Budan bylaı, tehnıkalyq qarap tekserýden ótkizý kezinde kólik salyǵyn tóleý týraly qujatty operatorǵa usyný talap etilmeıdi: tek avtomobıldiń ózin jáne onyń tehnıkalyq tólqujatyn usynsańyz jetkilikti bolady. Sonymen qatar, tehnıkalyq qarap tekserý týraly kýáliktiń qaǵaz blankilerin berý joıyldy. Operatsııa oıdaǵydaı ótken jaǵdaıda kólik ıesine dıagnostıkalyq karta beriledi. Óz kezeginde, tehnıkalyq qarap tekserýdi ótkizýdi tekserý biryńǵaı aqparattyq júıege suratý arqyly oryndalady»,-delingen QR Investıtsııalar jáne damý mınıstrliginiń málimetinde.
Sonymen birge, Memleket basshysynyń jaqyndaǵy tapsyrmasyna sáıkes, mindetti tehnıkalyq qarap tekserý shyqqanyna 7 jyl tolmaǵan avtomobılder úshin toqtatylatyn bolady. Jol júrisi týraly zańǵa tıisti túzetýlerdi osy jyldyń sońyna deıin engizý josparlanýda.
Belgili bolǵandaı, jyldyń basynan Qazaqstanda mindetti tehnıkalyq qarap tekserýge 1,6 mln. shamasynda jeńil avtomobıl usynyldy, onyń 1,4 mln-y mindetti tehnıkalyq qarap tekserýden sátti ótti.
